کراچی ءَ شش روچ ءَ پیش زورانسری آوار جنگ ءُ بیگواہ بوتگیں ڈیرہ بُگٹی ءِ چار بلوچ آجو بوتگ اَنت۔
زانگ بہ بیت کہ 06 ستمبر ءَ کراچی ءَ چیریں ادارھانی کارمنداں چہ ھوٹلے ءَ ڈیرہ بگٹی ءِ جھمنندیں دو بْراتاں ھوار چار مردم مھمد سابر ء میردھا بگٹی، شاہ مور ء میردھا بگٹی، نسیر اھمد ء دودا بگٹی ءُ مھمد پاروک ء شاہ بکش بگٹی بیگواہ کرتگ اَت اَنت، مروچی ھر چاریں مردم یل کنگ بیتگ اَنت-
دمگی مردمانء رد ءَ زورانسری بیگواھیں شاہ مور بگٹی دل ءِ نادراھی ءِ آماچ اِنت ءُ آئی ءِ بْرات ءُ نزیکیں سْیاداں پہ درمان کنگ ءَ کراچی برتگ اَت کہ چیریں ادارھانی کارمنداں آوار جنگ ءَ پد بیگواہ کرتگ اَت۔
اھوالکار ءِ رد ءَ چہ پاکستانی لشکر ءِ دست ءَ گار ءُ بیگواھیں بلوچ آزاری ءُ لٹ شاپی ءَ پد ماں نگیگی جاوراں مرچی یلہ کنگ بوتگ اَنت۔
بلوچستان ءَ بندوکیں مردم پاکستانی پوج ءُ چیریں ادارھانی دست ءَ آوار جنگ بیتگیں باز کم مردم یل بنت بلے آیانی پجیگ ءَ دگہ مردم ھم بیگواہ کنگ بنت-