مستونگ ءَ کمکی ءِ ودار ءَ ھارآماچانی یکرندے پد ءَ زھرشانی برجاہ

شال کراچی شھدگ سر ءَ نندانک سبب ءَ درّزنانی ھساب ءَ گاڑی پس اِتگ اَنت، زھرشانی کنوک توپان ءَ چہ اسرکپتگیں دمگانی پچّی ءُ کمکی دیگ ءِ لوٹ کتگ-

ھارآماچانی گْوشگ اِنت کہ دمگ ءَ توپان ءَ ھورانی تباھی ءِ سبب ءَ زندگی یے نزام درھم برھم بوتگ مردم بے لوگ بوتگ اَنت بلے ھکومت ءِ نیمگ ءَ چہ آیاں ناں تمبو رس اِتگ ءَ نانکہ ورگی توژگ دوا درمان دیگ بوتگ توپان ءَ ھوراں پد مئے چک گُژنگ ءِ دیمپان اَنت-

زھرشانی کنوکاں گْوشتگ کہ انتزامیہ اینچو روچ ءَ اسرکپتگیں بے مدت ءُ چار گوزار ءَ یل کتگ اَنت وپتگ اَنت واب گندگ ءَ اَنت آیاں اسرکپتگینانی ھچ پکر نہ اِنت دمگاں ناں لین ھست ناں گیس ناں ورگ واستا ساپیں آپ، توپان ءَ چہ لوگ تباہ بوتگ اَنت مردم بے لوگی ءَ روچ سر نندگ ءَ لاچار اَنت

مستونگ ءَ نندانک ءَ زالبول ءُ چکانی مزنیں کچے ھوار اَنت

زانگ بہ بیت توپان ءَ اسرکپتگیں گوستگیں بازیں روچاں چہ کمک پُجارینگ ءِ لوٹ ءَ کنگ ءَ اَنت اسرکپتگیں اشی ءَ ساری ھم شال کراچی شھدگ ءَ زھرشانی کنان ءَ بند کتگ بلے پد ءَ ایڈیشنل ڈپٹی کمشنر ءُ زھرشانی کنوکانی میان ءَ گپ ءُ تران ءَ پد نندانک ھلاس کتگ اَت-

زھرشانی کنوکاں گْوشتگ کہ آ دروگیں تسلھاں زھرشانی ءَ ھلاس نہ کن ایں اگاں ھکومت دمگی انتزامیہ اسرکپتگینانی جیڑہ گیشنگ ءَ سنجدیگ اِنت گڑا پیسر ءَ چست ءُ ایر ئِے بکن-

زانگ بہ بیت ھور ءُ توپاناں چہ بلوچستان ءِ سرجمیں 36 ضلع اسرمند بوتگ اَنت ھکومت ءِ رِد ءَ ھور ءُ توپان ءَ چہ بلوچستان ءَ 13 لکّ ءَ گیش مردم بے لوگ بوتگ اَنت، یک لکّ 85 ھزار ءَ گیش لوگ کپتگ اَنت یا کہ آیاں سک باز تاوان رس اِتگ بلوچستان ءَ گوستگیں روچاں بوتگیں ھوراں چہ بازیں دمگاں انگت زندگی ءَ ھمگرنچیں آسراتانی پچ کنگ نہ بوتگ اَنت-

ھمے وڑ بلوچستان ٹرانسپورٹ یونین ءَ جار جتگ بیست روچ گوزگ ابید بولان شھدگ ءِ پچ نہ بوگ بگیری ءَ باندا زھرشانی کن ایں دگ ءَ بند کن ایں-