ھار آماچیں دمگانی لاپ پُریں جنین ناگیگیانی دیمپان اَنت

ھئور ءُ ھارانی سوب ءَ ودی بوتگیں اڈ ءُ جنجال ءُ ھار آماچیں دمگاں آسراتی نہ بوگ ءِ سوب ءَ زالبولانی جان ءُ ساہ مرگانی دپ ءَ انت –

ڈبلیو پی سی ءِ سرکماش ءُ پارلیمانی سیکرٹری سائنس اینڈ انفارمیشن ٹیکنالوجی قانود ءُ پارلیمانی امور ڈاکٹر ربابہ خان بلیدئی ءِ رِد ءَ بلوچستان ءَ ھوار سرجمیں پاکستان ءَ ھار آماچیں دمگانی لاپ پُریں زالبولانی ھاتر ءَ ھچ وڈیں اژدری آسراتی دیگ نہ بوتگ گڈا کپگ ءِ وھد ءَ مزنیں کچے ءَ زالبول بیران بوت کناں –

میان استمانی ادارھانی کچ ءُ کساس ءِ اے وھدی بلوچستان ءَ ھوار سرجمیں پاکستان ءَ ھار آماچیں دمگاں کساس یک لک ءُ سِی ءُ ھشت ھزار لاپ پُریں زالبول ھست انت کہ آھانی تہ ءَ چِل ھزار زالبول ھمے ماہ ءَ کپگی انت- ھر چاریں سوبھانی سرکار ءَ لوٹیت کہ ھمے ماہ ءَ کپوکیں چلیں ھزار زالبولانی ھاتر ےَ گامگیج بہ زوریت موبائیل طبی ٹولی ھم اڈ بہ دنت – زانوگرانی رِد ءَ ھار آماچیں دمگاں لاپ پُریں جنین پہ طبی آثراتی بس نہ انت –

ڈاکٹر ربابہ بلیدئی ءَ گوشتگ کہ بلوچستان ءِ ھار آماچیں دمگ نصیر آباد ءَ ملیریا شنگ بوتگ کہ اشی ءِ انکیوبیشن ٹیمے گوزگ ءَ پد جاور ھال نگیگ بنت ءُ ملیریا نادراھانی تہ ءَ گیشی کئیت – دمگ ءِ تہ ءَ ملیریا ءِ درمان ھلاس بوتگ انت مھلوک دلسیاہ انت ھمے ھاتر ءَ سرکار ءَ ابید در سرکاری ادرھاں ھم دیما آھگی انت –

ھار آماچیں دمگاں سر بوتگیں کار کنوکیں پیرامیڈکس ءِ گوشگ انت کہ ھر ھما جاہ ءَ ھار ءِ آپ اوشتوک انت اودا وڈ وڈیں نادراھی پیدا بوگ ءَ انت – ھار آماچیں مردم گیسٹرو، ملیریا، لاپ درد ءُ دل ءُ لاپ نادراھی ءِ آماچ بوان انت-

زانگ بہ بیت ھئور ءُ ھارانی سوب ءَ سرجمیں بلوچستان ءَ سِی ءُ پنچ دمگ اسرمند بوتگ انت، سوبائی ڈیزاسٹر مینجمنٹ اتھارٹی بزاں پی ڈی ایم اے ءِ رِد ءَ بلوچستان ءَ ھئور ءُ ھارانی سوب ءَ دو سد ءُ ھپتاد مردم بیران بوتگ انت بلے پدا ھم ھئور ءُ ھاراں بلوچستان ءِ تہ ءَ بیران بوتگیں بید سرکاری کچ سک باز انت-

سرکار ءِ رِد ءَ بلوچستان ءَ سینزدہ لک مردم بے گس بوتگ انت- یک لک ءُ ھشتاد ءُ پنچ ھزار ءَ گیش گس کپتگ انت یا آھاں سک باز تاوان بوتگ -بلوچستان ءَ ھئور ءُ ھارانی سوب ءَ تنی وھدی بازیں دمگے ءِ مردمانی چو پیشی وڈا زند گوازینگ ءَ نہ انت –

ھمے زوتاں بوتگیں ھئوراں چی بلوچستان درساں گیشتر اثرمند بوتگ بلے پدا ھم سرکار ءُ واکدارانی کار سست روی ءِ آماچ انت ھئور ءُ ھارانی سوب ءَ بلوچستان ءَ بیران بوتگیں مردمانی کچ تنی وھدی سرجمی پکا نہ بوتگ انتوھدیکہ چہ بلوچستان ءَ دومی جاھاں رؤگے ھاتر ءَ ریل پٹی ءُ دگ تنی وھدی شر کنگ نہ بوتگ انت اے درگت ءَ واکدار سرجمی ءَ بے سوب انت-