پہ بلوچی وانگجاہ ءِ ھمبلیں باسکانی نام ءَ نمدی یے
نبشتہ کار: وسیم بلوچ
دی بلوچستان پوسٹ
دروت ءُ درھبات اِت، دراہ ءُ سلامت بات اِت من اُمیت کن آں شما وش ءُ جوڑ اِت، مرچی منی دل ءَ گْوشت کہ پہ شما نمدی یے نبشتہ بہ کن آن ءُ شمارا پہ ماتی زبان ءِ وانگ ءُ نبشتہ کنگ ءَ سکین ءُ دلبڈُی بہ دے آں بلے منی ڈولیں نابزانتے ءِ چے بستار؟ چوشکہ شما سرپد ات کہ راجے ءِ پجار زبان اِنت ۔اگاں زبان گار کنگ بوت آ راج نہ مان اِیت، ایو این او چارٹر ءِ رِد ءَ ھر راج ءَ آئی زبان وانینگ بہِ بیت بلے ما نہ گِند ایں چوشیں وانگجاھے کہ بلوچی وانینگ بوگ ءَ اِنت۔ مئے وانگجاھانی کورس ءِ کتاب اُردو ءُ انگلش ءَ اَنت، مئے نیکراھی کتاب اُردو ءُ دری زبان ءَ اَنت۔ ما ھر پِڑ ءَ چمّاں شانک بہ دے این ءُ بچار ایں مئے زبان لگتمال کنگ بوتگ، مرچاں مئے جِند ءِ راج ھم مجگی گُلام جوڑ بوتگ کہ وتی زبان ءَ را جَھل جَن اَنت ءُ اردو ءُ انگلش ءِ دُمب ءَ کپتگ اَنت، من نہ گْوش آں کہ شُما انگلش یا دگہ زبان مہ وان اِت بلکیں وتی ماتی زبان ءَ ھم بہ زان اِت کہ مئے پجار ءُ ھستی ءِ چِیدگ اِنت۔ مئے زبان انچو پُشت ءَ دور دیگ بوتگ گُڑا مارا ھم پہ وتی زبان ءِ دیمرئی ءِ واست ءَ چیزے کنگ لوٹ ایت۔
مرچاں یک جْوانیں آسراتی یے وٹسپی ءُ پیس بْوکی وانگجاھانی اِنت کہ ما وتی زبان ءَ ونت کُرت کن ایں۔ چوناھا مئے ماتی زبان پہ ما گِران نہ اِنت۔ بس مھر لوٹ ایت، وانگ ءُ جُھد لوٹ ایت۔ شما چیزے سنگت گْوشگ ءَ اِت کہ ما نبشتہ کنگ نہ زان ایں، من ھم چو شمئے پیم ءَ نبشتہ کنگ نہ زانتگ! من بندات ءَ واجہ ابدلستار بگُٹی ءِ اڈ کُتگیں دیوان ءَ ھوار بوتگ آں۔ مرچی استاد ءِ ھم لک منتوار کہ انچو دست گٹی ءِ تہ ءَ انگت مارا وھد داتگ ئِے ءُ مئے ردی کش اِتگ اَنت ئِے ۔مارا وانیتگ ءُ دلبڈّی داتگ ئِے ۔ مرچی ھمائی ءِ جُھد ءِ برکت اِنت کہ من چار دانک نبشتہ کُت کن آں ءُ انگت ھم من ءَ وانینگ ءَ اِنت، جُھد ءُ جپا کَشگ ءَ اِنت۔ گِند ئے شما ھم باندا الم دربر اِت۔
ما گوں شُما دزبندی کن ایں کہ جُھد بہ کن ات ھر روچ درونتاں وانان کن اِت گُڑا انشااللہ شما زوت دربر اِت۔ مرچی توری راجی زبان ءِ دربرجاہ بہ بیت ، جُھد ءِ کاروان بہ بیت یا سرگْوات لبزانکی کاروان بہ بیت ءُ دگہ ھم بازیں وٹسپی وانگجاہ ھست کہ آیاں جْوانیں جْوانیں استاد جوڑ کُتگ کہ پہ ماتی زبان ءَ یک کِردے ادا کنگ ءَ اَنت۔ مئے بلوچی وانگجاہ دیوان ھم پہ چار ھپتگ ءِ واست ءَ مہ بیت بلکیں جْوانیں کِردے ءِ واھُند بہ بیت۔
شالا ما یکجاہ ءُ تپاک بِہ بہ ایں ءُ مئے بلوچی وانگجاہ دیوان سوبمَنْد بات، شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔