بلوچستان لبریشن فرنٹ ءَ کیچ ءِ ھند تربت ءُ بالگتر ءَ پاکستانی لشکر ءُ ڈیتھ اسکواڈ ءِ کارمند ءِ سر ءَ اُرشانی زمہ واری منّ اِتگ۔
بی ایل ایف ءِ جارکش میجر گھرام ءَ وتی شنگ کرتگیں درشانے ءَ گوشتگ کہ دہ ستمبر شمبے ءِ روچ ءِ ادار سے ءَ کیچ ءِ بنجاھی شھر تربت ءَ نادراہ کارگس ءِ نزیک ءَ مئے سرمچاراں پاکستانی لشکر ءِ دو کارمندانی سر ءَ اُرش کتگ۔ اُرش ھما وھد ءَ کتگ کہ کارمند ھمے جاہ ءَ ترّ ءُ گرد کنگ ءَ بیتگ اَنت، اُرش ءِ آسر ءَ یک کارمَندے ھما جاہ ءَ مرتگ ءُ یکے ٹپی بیتگ۔
آئی ءَ گوشتگ کہ نُھ ستمبر آدینگ ءِ شپ ءِ ادار دہ ءَ کیچ ءِ ھنکین بالگتر لوپ ءِ ھند ءَ مئے سرمچاراں پاکستانی لشکر ءِ جوڑ کُتگیں ڈیتھ اسکواڈ ءِ کارمند ءِ سر ءَ اُرش کرتگ۔ اُرش ءِ آسر ءَ بالگتر ءَ کارکنوکیں طارق ء مھراب مرتگ ءُ آئی سلاہ دستیگ کرتگ اَنت۔
میجر گھرام ءَ گوشتگ کہ طارق ء مھراب بی ایل ایف ءِ باجوئیں سرمچارے بیتگ۔ بلوچ جھدکار ءُ سرمچارانی تاوان دیگ ءَ تچکی ءَ گوں بیتگ۔ مراد پنام اکبر ء عمر، سناء پنام استاد میرجان ءُ چاکر ء پنام پلیں، نسیب پنام سمیر ء جان مھمد ءِ شھیدی ءَ ھوار بیتگ۔ ھمے وڑ ءَ طارق ء مھراب ءِ برات عاقل پنام لنشو ء مھراب بی ایل ایف ءِ باجوئیں سرمچارے آئی ءَ سے سال پیش بی ایل ایف ءِ دو سرمچار باھڈ ساھب داد ءُ ھامد ء یوسف ءِ بالگتر لوپ ءَ شھید کنگ ءَ پد ریاست ءِ جوڑ کرتگیں کشندہ ٹولی ءِ سروک خالد یعقوب ءِ کمک ءَ پاکستانی لشکر ءِ دیم ءَ وتی سلاہ دور داتگ اَنت۔ بی این اے ءِ سرمچار شے ھک پنام گھرام ءِ شھید کنگ ءَ طارق ءُ آئی برات عاقل پنام لنشو ء مھراب گوں بیتگ اَنت۔
جارکش ءَ وتی درشان ءَ دیمتر ءَ گوشتگ کہ طارق ء مھراب پاکستانی لشکر ءِ ھمراھمی ءَ لشکر کشیاں گوں بیگ ءِ ھواری دمگ ءَ دُزی زوراکی، مردمانی سامانانی لُٹ ءُ پُل، نشہ ءِ باپاری ءُ دگہ چاگردی سلکاریاں ھوار بیتگ۔ طارق ء مھراب پاکستانی لشکر ءِ جوڑ کرتگیں ڈیتھ اسکواڈ ءِ سروک خالد ء یعقوب ءِ ٹولی ءِ کارمندے بیتگ۔ آ کیچ ءِ جتاھیں ھنداں پاکستانی لشکر ءِ چیردستی ءَ بلوچ جھدکارانی بگیری ءَ کار ءَ بیتگ۔
میجر گھرام ءَ گوشتگ کہ طارق ءُ ھمے وڑیں درسیں ریاستی کمکار راجی میاربار اَنت۔ جھد ء آجوئی دیم ءَ اڑاند بیوکیں کمکار ءُ چاریگانی ھال مارا سر بیتگ اَنت، آیانی بگیری ءَ مئے کاروائی گیش ترند کنگ بنت۔
جارکش ءَ وتی درشان ءِ گُڈسر ءَ گوشتگ کہ داں زورگپتیں بلوچستان ءِ آجوئی ءَ مئے اُرش گوں ترندی ءَ زورگریں پاکستانی لشکر، چیریں ادارہ ءُ آیانی ھندی کمکارانی بگیری ءَ برجاہ بنت۔