شال ءَ بلوچی زبان ءِ نمیرانیں کواس سید ھاشمی ءِ زند ءُ ازم ءُ دوازدہ کتابانی دیمرائی ءِ درگت ءَ مراگش

بلوچستان ءِ بنجاھی شھر شال ءَ بلوچی زبان ءِ نمیرانیں کواس ءُ زبانزانت سید ھاشمی ءِ یات ءَ یک مراگشے برجم دارگ بیتگ، مراگش ءَ سید ھاشمی ءِ زند ءُ ازم ءِ ھواری ءِ آئی ءِ دوازدہ نوک چاپ بوتگیں کتابانی دیمرائی ھم بیتگ اَنت-

مراگش نوری نسیر ھان کمپلکس ءَ اسپھنی دگ ءَ شعبہ بلوچی ڈپارٹمنٹ ءِ چیردستی ءَ برجم دارگ بیتگ –

مراگش ءَ بازیں ادبی ءُ زباندوست ءُ سیاسی ءُ نودربراں ھوار ھوار دگہ پھناتاں بندوکیں مردماں بھر زرتگ –

مراگش ءِ تلو ءِ زمہ واری بلوچی زبان ءِ نامی ئیں نبشتہ کار اے آر داد بلوچ ءَ کرتگ ءُ مراگش ءَ اسمبلی ءِ باسک سنا بلوچ، ھمل کلمتی، لالا رشید، بلوچی زبان ءِ نبشتہ کار ڈاکٹر رھیم بلوچ، الی دوست ءَ ھوار ھوار دگہ مردماں بازیں کچے ءَ بھر زرتگ-

مراگش ءَ سید ھاشمی ءِ زند ءُ ازم ءِ سر ءَ جتا جتائیں پھناتاں گپ کنگ بیتگ ءُ آئی ءِ ازم ءِ سر ءَ جتا جتائیں رنگ ءُ ڈولاں گپ بیتگ اَنت-

ترانکاراں گوشت کہ سید ھاشمی ھما کس اِنت آئی ءَ بلوچی زبان ءَ مزنیں ھزمت کرتگ اَنت چریشی ءَ مروچی بلوچی زبان ءِ وانوک ھست اَنت ءُ سید ءِ ازم بے مٹ اِنت کہ چریشی ءِ درور بلوچ راجدپتر ءَ باز کم گندگ ءَ کیت-

مراگش ءَ سید ءِ زند ءُ ازم ءُ پد سید ھاشمی ءِ نوک چاپ بیتگیں دوازدہ کتابانی دیمرائی ھم بیتگ اَنت آ جتا جتائیں نبشتہ کاراں چتگ ءُ نز آورتگ اَنت-

آیاں گوشتگ کہ اے دوازدھیں کتاب گوستگیں دو سالانی میان ءَ اشانی چن ءُ نز آرگ بندات بیتگ ءُ دانکہ اے کار سرجم بیتگ-