رنیبر کپور ءُ عالیہ بھٹ ءِ نوکیں تامر فلم برھماسترا ءَ 2 روچانی تہءَ 160 کروڑ ھندوستانی روپیہ ءِ کاروبار کُتگ۔
ھندوستانی رسانکدر ءِ ردءَ 410 کروڑ ھندوستانی روپیہ ءَ گوں جوڑ بیتگیں تامر برھماسترا باکس آفس ءِ سرءَ اولی روچ ءَ ریکارڈ پروشیں زر جوڑ کنگ ءَ اِنت، برھماسترا 9 ستمبر ءَ بھارت ءِ 5,019 اسکرینز ءُ درملک ءَ کساس 3,894 اسکرینزانی سرءَ شنگ کنگ بیتگ اَت۔
تامر ءِ تہءَ رنبیر کپور ءُ عالیہ بھٹ ءَ ابید ناگارجن، امیتابھ بچن، شاہ رخ خان اور مونی رائے ھم ھاسیں کرد پیلو کنگ ءَ اَنت۔
برھماسترا ءَ ھندوستان ءَ شنگ بیگ ءِ اولی روچ ءَ 36 کروڑ ءُ سرجمیں جھان ءَ چہ 75 کروڑ روپیہ ءِ باپار کُتگ اَت وھدیکہ تامر ءَ دومی روچ ءَ بھارت ءَ 42 کروڑ ءُ جھانی تَک ءَ 85 کروڑ روپیہ ءِ باپار کُتگ۔
اے پئیم ءَ تامر ءَ تھنا دو روچانی تہءَ سرجمیں دروشم ءَ 160کروڑ روپیہ ءِ بزنس کُتگ ءُ ھمے گمان کنگ بئیگ ءَ اِنت کہ تامرسئمی روچ ءَ 250 کروڑ روپیہ ءِ کچ ءَ باپار کنت۔
برھماسترا ءِ ڈائریکٹر آیان مکھرجی ءَ وتی چاگردی رسانکدر ءِ اکاونٹ ءَ چہ دو روچانی تہ ءَ تامر ءَ اڈ کُتگیں زرانی درگت ءَ شنگ کُتگ ءُ گُشتگ کہ جھان ءَ مھر ءَ چہ مستریں ھچ برھماسترا نیست اِنت۔ تھیٹر ءَ آیگ ءُ وتی مھر درشان کنگ ءِ ھاترءَ درستیں چاروکانی منتوار۔
تامر ءِ بنداتی ھپتگ ءِ ویک اینڈ ءِ ھاترءَ 23 کروڑ ءَ چہ گیشتر ٹکٹ بھا بیتگ اَنت۔ اے پئیما ‘برھماسترا’ ءَ پیسر بکنگانی تہءَ ‘RRR’ پُشت ءَ یل داتگ۔ بلے ‘برھماسترا’ ءَ ‘KGF 2’ پُشت ءَ یل دات نہ کُتگ۔