بلوچ چُکچینی ءُ زُورانسری بیگواھیاں پاکستانی لشکر ءِ ھمراھی ءَ آمیدگِس ھم جُرم ءَ شریدار اِنت- ڈاکٹر اللہ نِزر بلوچ

 بلوچستان لبریشن فرنٹ ءِ سروک ءُ بلوچ راجی رھشُون ڈاکٹراللہ نِزر بلوچ ءَ وتی درشان ءِ تہ ءَ گْوشتگ کہ بلوچ ءِ چُکچینی، زُورانسری بیگواھیاں ھوار اِنسانیت ءِ بگیر ءَ اے دِگہ جِرماں پاکستانی لشکر ءِ ھواری ءَ آمیدگِس ھم شریدار اِنت۔ انّوگیں آمیدگِسی سرگرمی، مزن وزیر (وزیراعظم) ءِ ماں آمیدگِس ءَ تلب کنگ ءُ چیپ جسٹس ءِ ریمارکس بلوچ راج ءَ را پرّامَگ اِنت ءُ پاکستانی آمیدگِسی نِزام ءِ سر ءَ سِتک ءُ باور ودی کنگ ءِ کُوشست ءَ ابید ھِچّے نہ اِنت۔ پاکستانی اسٹیبلشمنٹ ءَ آمیدگِس لشکری تاکت ءِ پابند اِنت۔ پابندیں ادارہ کدی ھم تاکت ءِ دیم ءَ سر ءَ چِست کُرت نہ کنت۔

آئی ءَ وتی درشان ءِ دیمتِر ءَ گْوشتگ کہ شھباز شریپ وتی شال (کوئٹہ) ءِ تر ءُ تاب ءِ دوران ءَ گوں ساپیں دانکاں گْوشتگ کہ آ زُورانسری بیگواھیانی بارو ءَ گوں واکداریں تاکتاں گپّ کنت۔ کُجا کہ مُلکے ءِ چیپ ایگزیکٹو کُلانی دیم ءَ اے جار ءَ بجنت کہ آ بیوس ءُ بے واک اِنت، گُڑا اُود ءَ یک جج ءُ نام گِپتیں آمیدگِسی نِزامے ءِ واکداری ءِ زانگ اِنچو گْران نہ اِنت۔ آمیدگِسی سرگرمی ءُ ریمارکس ءَ پد لھتیں روچاں پاکستانی لشکر ءَ چہ پنجاہ ءَ گیش بلوچ پُسّگ پہ زُورانسری گار ءُ بیگواہ کُرتگ۔ اے بابت ءَ ما ھمے سرپد بَہ اِیں کہ پاکستانی آمیدگِس ءُ چہ انّوگیں سرگرمیاں بلوچ ءِ دل ءَ پاکستانی نِزام ءِ سر ءَ یکّین ءُ اُمیتے ءِ ودی کنگ دُروگ ءُ پندلے۔  

پاکستانی آمیدگِس ءَ ھوار توام واکداریں ادارہ اے گپّ ءَ یات بِہ کن اَنت کہ بلوچ چہ پاکستان ءِ پندل سازیں نِزام ءَ سرگْوستگ۔ آئی دل ءَ پہ پاکستان ءِ واستا اُمیتے ءِ ودی کنگ نہ بُوَگ ءِ درور اِنت۔ دومی نیمگ ءَ آمیدگِس ءِ جِند ءِ اے ھال اِنت کہ انّوگیں یک پٹّ ءُ پولے (سروے ) ءَ پاکستانی آمیدگِس ءِ کارکردگی اِنساپ دَیَگ ءِ درگت ءَ یکسد ءُ سِیئمی (130) نمبر ءَ بوتگ۔

بلوچ رھشُون ڈاکٹر اللہ نِزر بلوچ ءَ وتی درشان ءِ دیمتِر ءَ گْوشتگ کہ بلوچ ءُ پاکستان ءِ مْیان ءَ سْیادی واجہ ءُ گُلام ئیگ اِنت۔ یک نوآبادی یے ءِ بِستار ءَ پاکستان مارا کُشت کنت، مئے بے شرپی ءَ کُرت کنت، بلے نُوں بلوچ ءِ دل ءَ پاکستان ءِ مھر ءُ بھیسہ ءَ ھِچّ رنگ ءَ پیداک کُرت نہ کنت، اے نُوں یک ابد نبشتگیں تاکدیمے۔

بلوچ رھشُون ڈاکٹر اللہ نِزر بلوچ ءَ وتی درشان ءِ گُڈّسر ءَ گْوشتگ کہ بلوچستان ءَ پاکستانی زُلم ءُ زُوراکیانی سَوَب ءَ اِنسانی زوالے ودی بوتگ۔ اے اِنسانی دردناکیں جاور چہ مْیان اُستمانی تاکتاں ھمے لوٹ ءَ کنت کہ آ بلوچستان ءَ زُوت دزمانگیجی بِہ کن اَنت ءُ بلوچ راج ءَ چہ اے وھد ءِ پِرھون ءِ زُلم ءُ زُوراکیاں بِہ رکّین انت۔