روکپتی بلوچستان ءَ ایرانی لشکر ءِ میان ءَ میڑے ءَ سَے کس بیران، ایرانی لشکر ءِ دو کارندہ زدگ

روکپتی بلوچستان ءَ ایرانی لشکر ءُ سلاہ بندیں مردمانی میان ءَ میڑ ءَ سَے مردم جنگ بیتگ ءُ یکے دزگیر کنگ بیتگ ءُ ھمے میان ءَ ایرانی لشکر ءِ دو کارندہ زدگ بیتگ اَنت-

سر بیتگیں اھوالانی رد ءَ روکپتی بلوچستان ءِ دمگ کھنوج ءَ ایران ءَ لشکر ءَ یک لوگے ءِ سر ءَ بیڑ برتگ ءُ اود ءَ سَے کس کشتگ ءُ یکے دزگیر کرتگ-

وئیل کھنوج ءِ دمگ مسکونی ءَ پیش اتکگ کہ اود ءَ ایرانی لشکر ءُ سلاہ بندانی میان ءَ جنگ ءُ چوپ بیتگ –

بیران بیتگیں مردمانی پجار کاظم بامری ء مراد دگہ دو کسانی سیادی ھم بامری ٹک ءَ اِنت کہ دلگان ءِ جھمنند گوشگ بیتگ اَنت-

دزگیر کنگ بیتگیں مردم ءِ پجار نہ بیتگ ءُ آ لشکر ءَ گوں وت برتگ –

اھوالانی رد ءَ گوشگ بیتگ کہ اے مردم کھنوج ءَ جاڑیگ بیتگ اَنت چریشی ءَ ایرانی چیریں ادارہ ءُ لشکر ءَ انگیر کرتگ ءُ اود ءَ دو نیمگی تیرگواری بنا بیتگ –

اھوالانی رد ءَ اے مردم پیسر ءَ ایرانی لشکر ءِ گور ءَ چہ باگی بیتگ اَنت بلے اے سبب زاھر کنگ نہ بیتگ چے سبب ءَ آ باگی بیتگ اَنت ءُ اے درگت ءَ ایرانی لشکری بنشوناں ھم دگہ گپ دیم ءَ نیاؤرتگ اَنت-