نبشتانک : سراوان ءِ سپر
نبشتہ کار : عابد ھیدر
دی بلوچستان پوسٹ
مرچی مدتے ءَ رَند پد ءَ روکپتی بلوچستان سراوان ءَ پاد ایر کُت اَنت، چد ءُ پیش من سراوان ءَ باریں چینچُک رند داتگ اَت ءُ چینچو وھد ءَ اد ءَ نشتگ آں، ھچ یات نہ بیت چیاکہ سراوان ریدگ ءُ کوھاڈ ءَ چہ پد منی دومی میتگ بوتگ۔ منی گوست ءِ بازیں یات ءُ ترانگ گوں سراوان ءَ بندوک اَنت، چونائی ءَ ھردیں مردم چہ وتی بُنّکی ھنکین ءَ چہ در بہ کپ ایت ءُ دگہ نیمگے ءَ بروت،توری آ سَپر پہ سَیل ءُ سوات ءَ بہ بیت یانکہ پہ روزگار ءِ نیمون ءَ بہ بیت بلے پد ءَ ھم مردم ءِ بنکی ھنکین آئی ءِ یات تُرانگ آئی ءِ ھمراہ بنت۔
ھمے وڑ ءَ،ھردیں منی گام سراوان ءِ دلبند ءَ کپتگ اَنت، گڑا من چہ وتی میتگ ءَ پراموش بوتگ آں ءُ سراوان وتی بُنّکی ھنکین پھم اِتگ۔ آ وھد ءَ من اے چیز ھچ بر نہ مار اِتگ کہ سراوان ءِ آ کجام چیز اِنت کہ منی میتگ ءِ ڈول ءَ انت، میتگ ءِ چَھرگ ءَ جنگ ءَ انتءُ من ءَ سراوان ءِ نِندگ ءِ سِکین ءَ دنت۔
بلے مرچی پد ءَ مُدتّے ءَ باد سر کہ سراوان ءَ کپت گڑا یک اجبیں گِرانی ءُ وس واسے ءَ من ءَ انگر کُت، انچْوش گمان بوگ ءَ اَت کہ من اد ءَ درامدے آں۔ وت ءَ اد ءَ ایوک مارگ ءَ اِت آں، اد ءِ ھر چیز بدل بوتگ اَت، ھمے مارِشت ءَ من ءَ جیڑگے ءَ دور دات۔
ھمے جیڑگانی تہ ءَ من سراوان ءِ بازار ءَ در کپت آن ءُ شوھاز ءَ لگ اِتاں کہ باریں آ کجام چیز اِنت کہ اد ءَ نہ اِنت، آ کجام چیز اِنت کہ من ءَ چو بے تاھیر ئِے کُتگ، ھمے واستا ھر ھما مردم کہ گوں آئی ءَ منی پجاروکی، ھمراھی ءُ دیوان بوتگ اَت، من درستانی کر ءَ شُت آں گوں آیاں نیند ءُ نیاد، دیوان ءُ مجلس کُت، ھر ھما گِس ءُ دُکّاناں شُت آں کہ آیانی توک ءَ نِشتگیں مردمانی چھرگ ءَ چہ آشنا اِت آں، سرجیمں بازار گول اِت، بلے تاھیر انگت رسگ ءَ نہ اَت، گڑا گڈسر ءَ پد ءَ وتی گِس ءَ اتکان ءُ چم وتی گس ءِ بَیٹک ءَ کپت اَنت کہ آئی ءِ در چہ پُشت ءَ بند اَت، آئی ءِ تہ ءَ ناں مردمی برمشے ءُ ناں کہ کندگ ءُ ٹھکے آیگ ءَ اَت، گڑا نو من پھم اِت کہ واکی سراوان ءِ زیبائی وَ منی لالا جان ءِ بچکند ، خالد پُل ءِ وش گپی بوتگ اَنت، آ کہ اد ءَ نہ انت گڑا سراوان نو چو منی بالاد ءَ تاھیر بکش اِت کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔