کانود ءُ سرکار یکرندے پد ءَ موہ داتگ انت کہ بیگواھیں مردمانی جیڑہ ءَ گیشگیوار بہ کن انت – سمی دین

زورانسری آوار جنگ بوتگیں ڈاکٹر دین محمد بلوچ ءِ زھگ ءُ وائس فار بلوچ مسنگ پرسنز ءِ رھشون سمی دین بلوچ ءَ گوشتگ کہ وشیں گپ یے سینٹ کمیٹی ءِ سروک وفاقی وزیر کانود اعظم نزیر تارڈ ءُ وزیر داخلہ رانا ثناء اللہ ءَ ھوار کمیٹی ءِ درسیں ممبر کہ چہ اسلام آباد اتکگ انت ءُ شال ءِ ریڈ زون ءِ زھرشانی نندانک ءَ کھولاں گوں دچار کپتگ انت ءُ آھانی لوٹ منّ اِتگ –

آئی ءَ گوشتگ کہ ما درسیں بیگواھیں مردمانی کھولاں یک رندے پد ءَ کانود ءُ سرکار موہ داتگ انت کہ مئے جیڑہ گیش ءُ گیوار بہ کن انت –

سمی ءَ گوشتگ کہ ما زھرشانی نندانک ءَ نشتگیں پنجاھیں بیگواھیں مردمانی کھولاں ھوار ھشت سد ءُ چِل ءُ سَے ایندگہ بیگواھیں مردمانی لڑ کمیٹی ءَ داتگ انت ءُ دروگیں میڑ، زورانسری اوار جنیانی گر ءُ دار ءُ لوٹ کتگ کہ مئے زورانسری آوار جنگ بوتگیں دوستیگیں مردم آمیدگس ءَ آرگ بہ بنت ءُ آھانی کانودی کاروائی کنگ بہ بیت –

آئی ءِ گوشگ ات کہ مئے لوٹانی گیشینگ ءِ ھاتر ءَ کمیٹی ءَ سَے ماھ ءِ وھد لوٹ اِتگ ءُ اے ھم تچکی ءَ گوشتگ کہ اگاں اے میان ءَ مئے لوٹ گیشینگ نہ بوت اَنت گڑا اے کمیٹی شمئے گوم ءَ ھوار زھرشانی ءَ نندیت ءُ گیشیں باور کنائینگ ءِ ھاتر ءَ مئے چارٹر آف ڈیمانڈ سر ءَ نزیر تارڑ وتی دز نشان ھم جتگ انت –

ما درسیں بیگواھیں مردمانی کھولاں یکجاہ نشتگ ءُ پد ءَ رند ءَ کمیٹی ءِ سر ءَ اوسٹ داشتگ ءُ وتی نندانک ھلاس کتگ – اگاں انگت مارا انساپ نہ رس ات گڑا چد ءُ ترندتریں گامگیج زور ایں بلے وتی دوستیگیں مردمانی یل کنائینگ ءَ تاں ھاموش نہ بہ ایں نہ نند ایں پد ءَ بوت کنت کہ ما اے ریاست ءِ سر ءَ ھچ وڑیں اوست ھم مہ دار ایں، امیت داریں سوبمندی مئیگ بیت اِنت –