ھزدار ءُ پنجگور ءَ دو مردم زورانسری آوار جنی ءَ پد بیگواہ

چہ بلوچستان ءَ دگہ دو ورنا زورانسری آوار جنی ءَ پد بیگواہ کنگ بوتگ انت –

سربوتگیں ھالانی رِد ءَ گوستگیں روچ ءَ سی ٹی ڈی ءُ چیریں ادارھانی کارمنداں ھزدار ءَ عمر فاروق چار راہ ءَ ورنایے زورانسری آوار جتگ ءُ گوں وت برتگ –

ورنایے پجار ممتاز ء محمد مراد جھمنند آواران مشکے ءِ نام ءَ بوتگ –

سی ٹی ڈی ءِ دست ءَ زورانسری آوار جنگ بوتگیں ورنا ھما انت کہ بیگواہ انت – اے ورنا چدوپیش سال دوھزار پانزدہ ءُ دوھزار ھبدہ ءَ دو رند ءَ پوج ءَ آوار جتگ ءُ بیگواہ کتگ بلے پد ءَ رند ءَ یل کنگ بوتگ ات –

دومی نیمگ ءَ چہ پنجگور ءَ ھمے ھال آیگ ءَ انت کہ یار جان ء عبدالمالک نامی ورنایے آوار جنگ ءُ بیگواہ کنگ بوتگ-

زانگ بہ بیت بلوچستان ءَ زورانسری آورجنیانی درچ یکشل ءَ برجاہ انت، بلوچستان ءِ سیاسی ءُ انسانی ھکانی گلانی گوشگ انت کہ اے آوارجنیانی تہ ءَ ایف سی، سی ٹی ڈی ءُ چیریں ادارھانی دست مان انت –

گوستگیں چیزے روچانی میان ءَ ھزدار ءُ پنجگور ءَ نُھ مردم آوار جنگ ءُ بیگواہ کنگ بوتگ انت –

گوستگیں روچ ءَ بلوچستان ءِ دمگ پنجگور ءَ پاکستانی پوج ءَ گِسے ءِ سر ءَ بیڑ برتگ ءُ پت گوں ھمراھے دو زھگاں آوار جتگ ءُ بیگواہ کتگ انت –

ھمے وڈ دو روچ ساری ھزدار ءِ دمگ گریشگ ءَ پھازگی لشکر ءَ لشکرکشی ءِ میان ءَ شش مردم آوار جتگ ءُ گوں وت برتگ انت کہ تنی وھدی دیما آرگ نہ بوتگ انت –