روکپتی بلوچستان: ھپت زندانی ایرانی آمیدگس ءَ پاھو داتگ اَنت

روکپتی بلوچستان ءِ دمگ میناب ءِ زندان ءَ ایرانی آمیدگس ءِ ھکم ءَ ھپت بندیگیں زندانی پاھو دیگ بیتگ اَنت-

سر بیتگیں ھالانی رد ءَ روکپتی بلوچستان ءِ دمگ میناب ءَ ایرانی آمیدگس ءَ ھپت بندیگیں بلوچ نشہ ءِ بھتام ءَ پاھو داتگ اَنت-

پاھو دیگ بیتگیں مردمانی پجار عبدالخالق نارویی جھمنند زھدان گرگان، سلیمان نارویی جھمنند زاھدان مازندران، عبدالغفور بھادرزادہ ریگی جھمنند گزگراغ تپتان، عباس نوبخت جھمنند رمشک گجن، مھمد زبیر جھمنند باغملک میناب مھممد کاظمی جھمنند جھرم، مھمد رضا ھدایتی جھمنند مشھد ءِ ناماں زانگ بیتگ اَنت-

اے ھپتیں مردم شمبے ءِ روچ ءَ چہ زندانیاں جتا کنگ ءُ یک زندانے ءَ برگ بیتگ اَنت –

ھپتیں مردمانی تہ ءَ شش کسانی سر ءَ نشہ ءِ بھتام بیتگ ءُ دگہ یکے ءِ بھتام زانگ نہ بیتگ اَنت کہ اشانی یک وانگجاھے ءِ استادے ھوار اِنت-

اے ھپتیں مردم ایرانی چیریں ادارھاں وھد وھد ءِ سر ءَ گپتگ ءُ برتگ اَنت-

روکپتی بلوچستان ءَ مردمانی سر ءَ پاھو دیگ یکشل ءَ برجاہ اَنت ھمے دو ماہانی تہ ءَ بیست ءِ نزیک ءَ مردم پاھو دیگ بیتگ اَنت-