گوریچانی وزیرستان: ٹی ٹی پی ءُ پاکستانی پوج ءِ میان ءَ جنگ، کیپٹنے کشگ بیتگ

گوریچانی وزیرستان ءَ تحریک طالبان پاکستان ءُ پاکستانی پوج ءِ کارندھانی میان ءَ جنگ ءُ چوپ ءَ کیپٹنے ءَ ھوار پنچ کارندہ مرتگ اَنت ءُ ٹی ٹی پی ءِ دو جنگول ھم جنگ بیتگ اَنت-

پاکستانی پوج ءِ جارکش ءِ رد ءَ سیکورٹی پورسز ءَ گوریچانی وزیرستان ءِ دمگ بویا ءَ چیریں ھالے ءِ رد ءَ بیڑ برتگ – ھمے وھد ءَ پوج ءُ جنگولانی میان ءَ جنگ ءُ چوپ بیتگ ءُ چار سلاہ بندیں مردم جنگ بیتگ اَنت-

جنگ بیتگیں پوجی کارندھانی پجار بیست ءُ شش سالی ئیں کیپٹن عبدالولی، نائب سوبیدار نواز، ھوالدار غلام علی، لانس نائیک الیاس ءُ سپاھی ظفر اللہ ناماں زانگ بیتگ اَنت-

ھمے وڑ ءَ تحریک طالبان پاکستان ءَ وتی درشان شنگ کنان ءَ جارکش مھمد خراسانی ءَ گوشتگ کہ “بویا ءِ ھنس دویگر شگہ ءَ پوج ءِ نیمگ ءَ مجاھدانی بنجل ءِ سر ءَ بیڑ اش برتگ چریشی ءَ مجاھداں پسو داتگ ءُ دشمنیں پوج ءِ کیپٹن ولی وزیر ءَ ھوار پنچ کارندہ کشتگ ءُ چار زدگ کتگ اَنت-

آئی ءَ گوشتگ ما وتی دو ھمراھانی جنگ ءِ ھال ءَ راست کن ایں-

زانگ بہ بیت ٹی ٹی پی ءُ پاکستان ءِ سرکار ءِ میان ءَ گپ ءُ رپ ءِ گامگیج برجاہ اِنت چریشی ءَ جنگ بندی بیتگ ءُ بلے اے ماہ ءِ بندات ےَ پولیس ءُ پاکستانی پوج ءِ سر ءَ اُرش بیتگ اَنت ءُ اے اُرش ٹی ٹی پی ءَ وتی پھازگی گشتگ اَنت-