ھار آماچیں مردمانی زھرشان، شال تاں کراچی ءَ رؤکیں شھدگ بند

مستونگ ءَ ھار آماچیں مردماں زھرشانی کنان ءَ بنجاھی شھدگ بند کتگ، ھار آماچیں مردمانی نیمگ ءَ مروچی سھب ءَ نندانک بندات کنگ بوتگ بلے دمگی واکدارانی گوم ءَ گند ءُ نند ءَ پد یکبرے نندانک ھلاس کنگ بلے ھار اماچیں مردماں دوبر شال تاں کراچی ءَ رؤکیں بنجاھی شھدگ ءِ سر ءَ نندانک جتگ ءُ دگ بند کتگ –

شال تاں کراچی ءَ رؤکیں شھدگ ءِ بند بوگ ءِ سوب ءَ بازیں گاڑی ءِ اُشتاتگ انت، زھرشانی کنوکاں لوٹ کتگ کہ ھار آماچیں دمگاں کار کنگ ءُ کمک دیگ بہ بیت –

درنگاز کنوکانی گوشگ انت کہ ھئور ءُ ھاراں تباھی کتگ سرجمیں نزام درگان درگان انت بلے بازیں روچانی گوزگ ءَ پد ھم ھچ کار بوگ ءَ نہ انت دمگی واکدار ءُ سرکار مھلوک ءَ ھچ ریلیف دیگ ءَ نہ انت ھار آماچیں دمگاں ناں لین ھست ءُ ناکہ گیس ءُ پہ ورگ ءَ ساپیں آپ، ھارانی سوب ءَ گس تباہ بوتگ انت – مردم پچیں آزامان ءِ چیر ءَ زند گوزینگ ءَ لاچار انت –

درنگاز کنوکانی گوشگ ات کہ دمگی واکداراں مردم بے یار مددگار یل داتگ ءُ وت وش واب انت کہ ھار آماچین مردم لاچار بوتگ انت کہ زھرشانی بہ کن انت گڈا پدا اڈیشنل ڈپٹی کمشنر ءَ گند ءُ نند ءِ داوت داتگ ءُ وتی کارگس ءَ لوٹارینتگ بلے آئی ءَ ھار آماچین مردم مطمئین نہ کرتگ انت –

مستونگ نندانک ءَ زھگ ءُ زالبول ھم مزنیں کچے ءَ ھوار انت ءُ دمگی واکدار شھدگ ءِ پچ کنگ ءِ ھاتر ءَ درنگاز کنوکانی گوم ءَ گند ءُ نند ھم کنگ ءَ انت –

درنگاز کنوکانی گوشگ انت کہ دروگیں کول کراراں پہ زھرشانی ءَ ھلاس نہ کن ایں اگاں سرکار ءُ دمگی واکدار جیڑھانی گیشگیوار کنگ ءَ سنجیدگ انت گڈا اول ءَ گامگیج بہ زور انت ءُ پیش بہ دار انت –

دومی نیمگ ءَ دمگی واکدارانی گوشگ انت کہ ھار آماچیں دمگانی تہ ءَ کار بوگ ءَ انت بلے ھو بازیں دمگاں ترندیں ھئور ءُ ھارانی سوب ءَ روگ آھگ نہ بوگ ءَ انت ءُ ھمے سوب ءَ کار اڈاندانی دیمپانی کنگ کپگ انت بلے واکدار ءُ سرکار اے دمگاں وتی کار برجاہ داشتگ انت –