ھزدار: زورانسری آوار جنیانی بگیری ءَ دمگی مردمانی زھرشانی

دزنگاز کنوکاں ھزدار ءِ دمگ گریشہ ءَ شھدگ بند کُتگ ءُ زھرشانی کتگ –

گوستگیں روچ ءَ ھزدار ءِ دمگ گریشہ ءَ پوج ءِ دست ءَ آوار جنگ بوتگیں شش ایں مردمانی زورانسری آوار جنی ءِ بگیری ءَ دمگی مردماں زھرشانی کنان ءَ بنجاھی شھدگ بند کتگ، درنگاز کنوکاں لوٹ کتگ کہ گریشہ ءَ پوج ءِ دست ءَ آوار جنگ بوتگیں مئے دوستیگیں مردم یل کنگ بہ بنت –

گریشہ ءِ وئیل ءِ بگیری ءَ مروچی سھب ءَ بندات بوتگیں زھرشانی ءِ سوب ءَ دگ بند بوتگ ءُ سرجمیں گاڑی اُشتاتگ انت کہ پدا رند ءَ دمگی واکدارانی ءُ درنگاز کنوکانی میان ءَ گند ءُ نند بوتگ ءُ واکدارانی باور کنائینگ ءَ پد زھرشانی ھلاس کنگ بوتگ –

زانگ بہ بیت گوستگیں روچ ءَ ھزدار ءِ دمگ گریشگ ءَ مزنیں کچ ءَ پاکستانی پوج ءَ بیڑ برتگ ءُ پت ءُ چار زھگاں ھوار شش مردم آوار جتگ ءُ بیگواہ کتگ انت –

ھزدار گریشہ ءَ پوج ءِ دست ءَ آوار جنگ بوتگیں مردمانء پجار خیر بخش ء شئے محمد، داد کریم ء شئے محمد،مقصود ء شئے محمد، نعیم ء شئےمحمد، شئے محمد ءُ ڈاکٹر کریم بخش ء بہار ءِ ناماں چہ بوتگ انت –

بلوچستان ءَ زورانسری آوار جنیانی درچ یکشل ءَ برجاہ انت، زورانسری آوار جنیانی ءِ درگت ءَ توار چست کنوکیں گل وائس فار بلوچ مسنگ پرسنز ءِ رِد ءَ زورانسری آوار جنیانی درچ یکشل ءَ برجاہ انت وھدیکہ اے آوارجنیانی تہ ءَ کمی آیگے بدل ءَ گیشی آیگ ءَ انت –

دومی نیمگ ءَ بیگواھیں مردمانی کھولاں مروچی چِل ءُ ھپت روچ سرجم انت کہ شال ءَ گورنر کارگس ءِ دیم ءَ نندانک ءِ جتگ ءُ زھرشانی انت – زورانسری آوار جنگ بوتگیں بیگواھیں مردمانی کھولاں گوستگیں روچاں زھرشانی کنان ءَ شھدگ ھم بند کرتگ انت –