سربیتگیں ھالانی ردءَ ناشناسیں سلاہ بندیں مردماں شال ءَ چہ بلوچستان مزن شھدربرجاہ ءِ نودربر زورانسری آوار جتگ، ھمے پئیم ءَ چہ کراچی ءَ یک مردمے لشکریاں آوار جنی ءَ پد بیگواہ کُتگ۔
شال وئیل ءِ اھوال دیان ءَ پشتون تحفظ موؤمنٹ شال ءِ رھشون زبیر شاہ آغا ءَ گُشتگ کہ بلوچستان شھدربرجاہ ءَ فارمیسی ءِ تکءَ سیادی داروکیں نودربر سید اللہ ء حبیب اللہ گوستگیں روچ ءَ سھب ءِ ادار 7 ءِ نزیک ءَ آئی لوگ میکانگی دگ شال ءَ چہ وائرلس سیٹسانی پجیگ ءَ اتکگیں سادگیں پوشاک گوریں 4 ناشناسیں مردماں بیگواہ کُتگ ءُ گوں وت بُرتگ۔
ورناہ دزگیری ءَ پد ناشناسیں جاھاں برگ بیتگ کہ آئی ءَ پد آ بیگواہ اِنت۔
زبیر شاہ آغا ءِ ردءَ وھدے ورناہ ءِ کھول ارزی نبشتہ کنگ ءَ تھانہ ءَ شُتگ اِنت گُڑءَ پولیس ءَ ارزی نبشتہ کنگ ءَ چہ تچکی ءَ مہ کن کُتگ-
زانگ بہ بیت کہ بلوچستان ءَ زورانسری بیگواھی ءُ بیگواھی دروشمیں دزگیریانی وئیل یکشلی ءَ دیما پیداک اَنت، بلوچستان ءَ سیاسی ءُ انسانی ھقانی گل اے وئیلانی تہءَ ایف سی، سی ٹی ڈی، ءُ چیریں ادارگانی ھواری ءِ گپ ءَ جن اَنت۔
زورانسری بیگواھیانی بگیرءَ زھرشانی ءُ درانگازی یکشلی ءَ گوں گوستگیں بازیں سالاں چہ برجاہ اِنت۔ بلوچستان ءِ سیاسی گل بلوچستان ءَ زورانسری بیگواھیانی یکشلی ءَ دارگ ءُ بیگواھیں مردمانی دیما آرگ ءِ لوٹ کنگ ءَ اَنت۔
یات بہ بیت زیارت وئیل ءَ پد بیگواھیں مردمانی کھولانی نیمگءَ برجاھیں زھرشانی نندانک شال ءِ ریڈ زون ءَ مروچی 47 ءَ پد ھم برجاہ اِنت کہ اِشی تہءَ بلوچ ءُ پشتون سیاسی باسک مزنیں کساس ءَ بھر زیرگ ءَ اَنت۔
دومی سربیتگیں ھالانی ردءَ سند ءِ بنجاھی شھر کراچی ءَ بلوچانی بیگواہ کنگ ءِ درچ یکشلی ءَ گوں برجاہ اِنت دگہ یک مردمے لشکریاں آوار جنگ ءَ پر ناشناسیں ھنداں بُرتگ۔
بیگواہ بیتگیں مردمے پجار علی بخش ء امید علی ءِ نام ءَ چہ بیتگ۔
کھول ءِ ردءَ کراچی ءِ زرباری ھنکین عبدالرحمان گوٹھ ھاکس بے ءَ چہ ھمے مردم بیگواہ کنگ بیتگ۔ کہ آئی بُنکی سیادی بلوچستان ءِ دمگ آواران ءَ چہ گُشگ بئیگ ءَ اِنت۔
دوشمبے ءِ روچ ءَ بیگواہ بیتگیں علی بخش ءِ کھول ءَ رسانکدر ءَ گُشتگ سادگیں پوشاک گوریں کارمنداں آ چہ عبدالرحمان گوٹھ ھاکس بے ءَ چِست کُتگ، کہ داں انگت بیگواہ اِنت۔
بیگواہ بیتگیں مردمے کھول ءِ ردءَ آ لھتیں سال پیسر چہ آواران ءَ کراچی ءَ لڈ اِتگ اَنت۔ آ عبدالرحمن گوٹھ ءَ یک راشن ءِ دوکان ءِ جنزینگ ءَ بیتگ اَنت۔ کہ چہ اِشی ءَ وتی لوگے ھرچ درچ کش اِتگ اِش۔
بلوچ یکجہتی کمیٹی کراچی ءِ آرگنائزر آمنہ بلوچ ءَ چہ کراچی ءَ یکشلی ءَ گوں بے میاریں بلوچانی زورانسری بیگواھی ءِ سرءَ تُرس ءِ درشان کنان ءَ گُشتگ کہ سند سرکار یک نیمگ ءِ گوم ءَ کرار کنت ءُ دومی نیمگ ءَ زورانسری بیگواھیانی تہءَ گیشی آیگ ءَ اِنت۔ سند سرکار ءَ دروگیں پالیسی کارمرز کُتگ۔ سرکار ءَ ایمانداری ءَ گوں گپ رَپ کنگ لوٹیت۔
آمنہ بلوچ ءَ گُشتگ کہ یک بیگواھیں مردمے یل کنگ بیت گُڑءَ دومی نیمگ ءَ سئے بے میاریں مردم بیگواہ کنگ بنت۔ آئی ءَ چہ سند سرکار ءَ لوٹ کُتگ کہ کراچی ءَ چہ بیگواہ بیتگیں درستیں مردماں یل کنگ بہ بیت۔