ھُزدار ءَ پوج ءِ دست ءَ شش مردم آوار جنگ ءَ پد بیگواہ کنگ بوتگ اَنت

بلوچستان ءِ دمگ ھُزدار ءَ گوستگیں شپ ءَ پاکستانی پوج ءَ لوگاں بیڑبرتگ ءُ شش مردم آوار جنگ ءَ پد بیگواہ کتگ اَنت-

گیشیں ھالانی رِد ءَ ھُزدار ءِ دمگ گریشگ ءَ مزنیں کچے ءَ پاکستانی پوج ءَ بیڑبرتگ ءُ پت ءُ چار چکاں ھوار شش مردم آوار جنگ ءَ پد ناشناسیں جاھے ءَ برتگ اَنت-

آوار جنگ ءَ پد بیگواہ کنگ بوتگینانی پجّار خیر بخش ء شئے محمد، داد کریم ء شئے محمد، مقصود ء شئے محمد ، نعیم ء شئے محمد، شئے محمد ءُ ڈاکٹر کریم بخش ء بھار ناماں چہ بوتگ اَنت-

زانگ بہ بیت کہ بلوچستان ءَ زورانسری آوار جنی ءِ وئیل ھمکروچ ءَ دیم ءَ آھگ ءَ اَنت، زورانسری آوار جنی ءِ درگت ءَ کار کنوکیں گل وائس فار بلوچ مسنگ پرسنز ءِ رِد ءَ آوار جنی ءِ وئیل ھمکروچی ردءَ برجاہ اَنت ھمے سال ءَ اپریل ءِ ماہ ءَ کراچی یونیورسٹی تراک ءَ پد زورانسری آوار جنی ءِ وئیل تہ ءَ گیشی اَتکگ-

دومی نیمگ ءَ بیگواھیں مردمانی کھول 45 روچ ءَ چہ شال گورنر ھاؤس ءِ دیم ءَ نندانک جتگ اِت، زورانسری آوار جنی ءِ بیگواھیں مردمانی کھول ءَ گوستگیں روچاں زھرشانی ءَ شھدگ ھم بند اِش کتگ-