نبشتانک: آجوئی بنی آدم ءِ واھشت اِنت
نبشتہ کار : جلال اھمد
دی بلوچستان پوسٹ
اگاں ما بِہ چاریں اے دنیا ءِ جوڑ بُوّگ ءَ رند انسان جوڑ کنگ بُوتگ ءُ گْوشت کن ئے کہ انسان اے دنیا ءِ مستریں ءُ شرتریں بھر اِنت ءُ انسان اے دنیا ءِ تَہ ءَ یک مزنیں کِردے پیلو کنگ ءَ اِنت، اگاں انسان مہ بُوتیں گُڑا اے دنیا ناسرجم اَت ءُ دنیا ءَ را ھچ پئیمیں بستار نہ بُوتگ اَت۔ ھما وھد ءَ کہ انسان پیداگ بیتگ گُڑا چیزے مُدّت ءَ پد آئی ءِ کَد ءُ کَچ ءَ مزن بُوّگ ءَ ھَوار آئی ءِ اَگل ءُ ھُوش ھم وَدّ اِتگ پد ءَ آئی ءِ کھول ءَ گوں کار دار اِیت کہ آئی ءِ گِسے مردم کُجام تَب ءِ مردم اَنت ءُ آیانی دُود ءُ ربیدگ، آیانی نِندگ ءُ پاد آیگ، آیانی پُچ ءُ پُوشاک ءُ زُبان کجام وڑین اَنت۔ اولی رند ءَ ھر چُک زانت ءَ وتی گِس ءَ چہ دَربارت، دَربرگ ءَ چہ پد آئی ءِ جِند وت اے چیز ءَ پدّر کنت کہ آئی ءِ کھول ءَ مردم چُونیں تَب ءِ مردم اَنت آیانی تَہ ءَ کجام چیز ءِ نِزوری ھست ءُ کجام چیز ءَ تَمرد اَنت-
اے دنیا ءِ تہ ءَ جتاجتائیں راج زندگ اَنت ءُ آیانی زُبان ءُ دُود ءُ ربیدگ، پُچ ءُ پُوشاک دْوراھیں چیز جتا اَنت، آیاناں جتائیں ڈیھ ھست کہ آیانی پت ءُ پیرکاں ھمودا زندگی گْوازینتگ ءُ وتی ھلک ءُ دَراں پہ آسُودگی نِشتگ اَنت۔ اگاں دنیا ءَ کساس بِہ کن ئے گُڑا سک مزن اِنت ءُ دنیا ءِ تَہ ءَ ھزاراں راج ھست اَنت کہ آیاناں جتائیں ڈیھ ءُ جتائیں زُبان ھست کہ آ وتی زندگی ءَ پہ آزاتی گْوازینگ ءَ اَنت آیانی وانگ ءِ زَلُورت، آیانی نادْوراھجاہ ءُ زندگی ءِ دْراھیں آسراتی سرجم اَنت ءُ آ پہ شاتمانی زندگ اَنت۔
انسان یک کَچّے ءَ کیت کہ آ وتی بَد ءُ نیک ءُ شَر ءُ گَندگ ءَ پھم اِیت ءُ ھر بنی آدم یک جتائیں پِگرے ءَ گوں وتی وھد ءَ تیلانک دَنت ، ھر انسان ءِ ھیال ءُ جیڑہ جتا اَنت، ھر انسان یکے دومی ءَ چہ جتا اِنت پِگر کنت ھر کس وتی زندگی ءِ اَڑ ءُ جنجالاں گوں سر ءُ چیر اَنت ءُ ھر کَس پہ وت وش ءُ وژدلیں بانداتے لوٹ اِیت۔
دنیا ءِ کجام ھم انسان بِہ بیت آ لوٹ اِیت کہ من وش ءُ وشھال بِہ باں ءُ وتی زندگی ءَ گوں آجوئیں دلے بِہ گْوازیناں، بلے زندمان ءِ تَہ ءَ ھر بنی آدم ءِ اے لوٹ سرجم ءَ نہ بنت، ھر مردم ءَ را اے مُوہ نہ رس اِیت کہ آ زندگی ءَ وشھال بِہ بیت۔
بلے ھر راج ءِ نیام ءَ راجدوست ءُ جُھدکار ھست اَنت بلکیں آیانی جِندے واھگ سرجم نہ اَنت بلے آ پہ راج ءَ وتی زندگی ءِ روچاں ندر کنگ ءَ اَنت، آیانی مکَسد بس ھمیش اِنت کہ مئے جُھد پہ آیْوکیں پدریچ ءِ کار ءَ بئیت، مئے مروچیگیں جُھد ءِ بَرورد باندات ءِ آیْوکیں نسل ءَ وشھال بِہ کنت ءُ مئے راج ءِ لُوٹ ءُ گُزر دْوراہ سرجم بِہ بنت ءُ سرڈگار آجو بِہ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔