روکپتی بلوچستان: ایرانی آمیدگس ءَ دو سیاسی باسک پاھو داتگ اَنت

مروچی ایرانی آمیدگس ءِ ھکم ءَ دزاپ ءَ دو ورنائیں سیاسی باسک پاھو داتگ اَنت-

گیشیں ھالانی رد ءَ روکپتی بلوچستان ءِ بنجاھی شھر دزاپ ءَ ایرانی آمیدگس ءَ دو زندانی پاھو داتگ اَنت –

پاھو دیگ بیتگیں مردمانی پجار مھسن کمبرزئی پنام نسر اللہ ء جمہ ءُ عین اللہ کمبرزئی ء ھاجی رھمت جھمنند شندک ءِ ناماں زانگ بیتگ اَنت-

ھالانی تہ ءَ گوشگ بیتگ کہ عین اللہ ءُ مھسن دگہ یک مردمے ءِ ھمراھی ءَ کہ آئی ءِ نام مولوی نورالدین کاشانی ءِ ھمراھی ءَ گرگ بیتگ ءُ کوش ءِ بھتام ءَ اشانی سر ءَ سی ءُ پنچ سال زندان اتکگ بیتگ-

اے ھردوکیں زندانی شش سال ءَ داں زاھدان ءِ مزنیں زندان ءَ بندیگ بیتگ اَنت کہ آیانی ھچ وڑیں پیشی نہ بیتگ اَنت-

ھالانی تہ ءَ گوشگ بیتگ ایرانی سال نود ءُ ھشت ءَ اے ھردوک ایرانی چیرین ادارھانی کارندھاں پہ دگانی سر ءَ زھرشانی ءِ بھتام ءَ گپتگ اَنت ءُ پد ءَ آیانی سر ءَ کوش ءِ بھتام جتگ –

روکپتی بلوچستان ءَ ھمک سال بازیں کچے ءَ سیاسی باسک، نشہ باپاری ءُ کوش ءِ بھتاماں ھوار ھوار دگہ ناشریانی بھتاماں مردم یکشل ءَ پاھو دیگ بیگ ءَ اَنت –

روکپتی بلوچستان ءَ ھواریں انسانی ھکانی گلانی گوشگ اِنت کہ ایرانی آمیدگس اے مردماں وتی سپاھی کنگ ءِ موکل ءَ نہ دنت ءُ چریشی ءِ سر ءَ آیاں پاھو دیگ اِنت-