بلوچستان: توپان ءَ کجام نادراھی تالان بیگ ءَ لگ اتگ

بلوچستان ءَ ترندیں ھور ےُ جتا جتائیں جاھاں ترندیں ھارانی آیگ ءِ سبب ءَ اسرمندانی سرجم کنگ ءِ سرجمی کنگ نہ بیتگ اَنت اسرمند جتا جتائیں نادراھیانی آماچ اَنت-

کھر آماچیں دمگاں سر بیتگیں کار کنوکیں پیرا میڈیکس ءِ گوشگ اِنت ھمود ءَ توپان بیتگ ءُ پد ء آپ جل اتگ اَنت اود ءَ جتا جتائیں رنگیں نادراھی ود اتگ اَنت – توپان آماچیں مردماں پوست، دل ءُ لاپ، ملیریا، لاپ درد، ءُ سر پچیں آسمان ءِ چیر ءَ نندگ ءِ سبب ءَ تپ ءِ آماچ بیان اَنت-

ھزدار ءَ ھورانی گوارگ ءُ آیوکیں توپان ءَ پد اود ءَ نادراھی یے ترندی ءَ ھزدار ءِ شھر ءُ کوچگی دمگاں تیزی ءَ گوں ودگ ءَ لگ اتگ ھزدار ءَ دل ءُ لاپ ءِ نادراھی گیش بیتگ ءُ اود ءَ وبا ءَ بیران بیتگیں مردمانی کچ بیست ءَ سر بیتگ اَنت-

ھزدار ءِ دمگدار ءُ مھکمہ ءِ ھیلتھ دل ءُ لاپ ءِ نادراھی ءِ گر ءُ دار کنگ ءِ ھاتر ءَ بے سوبی گندگ ءَ آیگ ءَ اِنت شش سد ءَ گیش نادراہ ھسپتال ءَ آرگ بیتگ اَنت گوستگیں روچاں ھزدار ءُ کش ءُ گوری دمگاں دل ءُ لاپاں بیران بیتگیں مردمانی کچ بیست ءَ سر بیتگ اَنت ءُ نادراھانی کچ شس سد ءَ سر بیتگ اَنت-

کوھلو ینگ ڈاکٹرزانی نیمگ ءَ توپان آماچیں مردمانی واستا برجم کتگیں میڈیکل بنجل ءَ لاپ درد ءُ ملیریا ءِ بازیں نادراہ آرگ بیتگ اَنت کہ آیانی تہ ءَ بازینانی جاور ناگیگ گوشگ بوگ ءَ اَنت ینگ ڈاکٹرزانی نیمگ ءَ کوھلو ءُ کش ءُ گوراں ملیریا ءَ اسرمند بیتگیں زھگ شال ءَ برگ بیتگ اَنت-

بلوچستان ءَ توپانی ھوراں پد آسرمندیں دمگاں ناوشیں نادراھیانی وتی پنچگ ایر داتگ اَنت اے دمگاں دارو درمان نہ بوگ ءَ نادراھانی گر ءُ دار ءُ جانسلامتی ءِ دراھی ءَ بازیں جیڑھانی دیمپانی اِنت ءُ دگانی پروشگ ءُ زمینی راھانی بند بوگ ءُ شھرانی نیمگ ءَ روگ ءُ جاندراھی ءِ واستا سپر کنگ مشکلے جوڑ بیتگ-

گوستگیں ماہ ءُ بیوکیں ھوراں بلوچستان ءَ بازیں شھر ءُ کوچگ توپان ءَ وتی ارجان جتگ اَنت ترندیں ھورانی گوارگ ءَ ھشتی لوگ کپتگ ءُ مھلوک سرپچیں آسمان ءِ چیر ءَ زندگی کنگ ءَ لاچار بیتگ اَنت آسرمندیں جاھاں سرکاری کار کنوکیں ادارھانی نیمگ ءَ سرجمی ءَ کار بندات نہ بیتگ اَنت-

استانی ڈیزاسٹر مینجمنٹ اتھارٹی ءِ نیمگ ءَ شنگ کنگ بیتگیں یک رپورٹے ءِ رد ءَ ایوک ءَ ھورانی گورگ ء وھد ءَ بیران بیتگیں مردمانی کچ دو سد ءُ پنجاہ ءَ سر بیتگ اَنت اے مردمانی تہ ءَ نادراھی ءِ آماچی ءَ بیران بیتگیں مردم ھوار نہ اَنت-

ھمے توپان ءَ اسرمندی ءَ بے لوگ بیتگیں لسبیلہ ءِ مھلوک ڈائریا ءُ پوست ءِ نادراھی ءِ آماچ بیتگ اَنت دمگی مردمانی گوشگ اِنت پروشت ءُ پروشیں دگانی سبب ءَ ھسپتال ءَ روگ ناسرجمی اِنت-

ھمے وڑ ءَ توپان آسرمندیں نصیر آباد ءِ دمگاں ھوار ھب چوکی ءِ دمگاں پوست ءُ چمانی نادراھی ءَ بازیں کچے ءَ زالبول ءُ زھگ آسرمند اَنت-

جانسلامتی ءِ رد ءَ توپانی آپانی مچ بوگ ءَ گند ءُ گسڑ ءِ شنگ بیگ، ڈینگی، ملیریا، پوستی انفیکشن، معدہ ءِ نادراھی ءُ آپاں پیداگ بوتگیں دگہ نادراھیاں بلوچستان، سندھ ءُ زرباری پنجاب ءَ توپان آماچیں مردمانی جانسلامتی ناوشی اِنت مکسکانی گیشی بیتگ-

بلوچستان ءِ گھبودی گلاں، جانسلامتی، سرکار ءُ میان اُستمانی ادارھاں گوں دزبندی کتگ اسرمندیں دمگاں کمک ءَ سرجمی بہ کنت اگاں ناں جاور سک ناگیگ بنت-