زورانسری آوارجنیانی میان استمانی روچ : کراچی ءَ زھرشانی

مروچی بزاں سِی اگست ءَ سرجمیں دنیا ءَ زورانسری آوارجنیانی میان استمانی روچ دارگ بوگ ءَ انت ھمے درگت ءَ مروچی سندھ ءِ مزن شھر کراچی ءَ ھم زورانسری آوار جنیانی بگیری ءَ ہیومن رائٹس کمیشن آف پاکستان ءِ نیمگ ءَ کراچی پریس کلب ءِ دیم ءَ زھرشانی کنگ بوتگ کہ اودا سول سوسائٹی ءَ ھوار سیاسی پاٹیانی رھشون ، باسک ءُ بیگواھیں مردمانی کھولاں بھر زرتگ –

زھرشانی ءَ شنگ کار ءُ اھوالکار لالا فہیم بلوچ ءِ یل کنائینگے ھاتر ءَ کلمکار، اھوالکار شنگکار ءُ سیاسی باسکاں نارہ جتگ، آھانی دست ءَ فہیم ءِ اکس ءُ بینرز بوتگ انت – زھرشانی ءَ کراچی ءِ دمگ ماری پور ءَ آوار جنگ بوتگیں عمران بلوچ ءُ گلستان جوھر ءَ آوار جنگ بوتگیں عبدالحمید زھری ءِ کھول ءَ ھم بھر زرتگ –

ھمے وھد ءَ ہیومن رائٹس کمیشن آف پاکستان ءِ سرکماش اسد بٹ، کرامت علی، مہناز الرحمن، بلوچ یکجھتی کمیٹی کراچی ءِ آرگنائزر وہاب بلوچ ءَ ھوار دگہ درنگاز کنوکاں تران کتگ –

ترانکارانی گوشگ ات کہ سرکار ءُ ادارہ کانودانی پلامرزی ءَ بہ کن انت ءُ بیگواھیں مردم آمیدگساں آرگ بہ بنت ءُ کانود ءُ رھبندانی رِد ءَ سندھ ءَ بیگواھیں مردم یل کنگ بہ بنت –

ترانکارانی گوشگ ات کہ کانود جوڑ کنوکیں ادارہ درکانودی کار کنگ ءَ انت کہ چریشی ءَ سندھ ءِ تہ ءَ ھم انسانی ھکانی لگتمالی بوگ ءَ انت – اے وھدی بے کساس ءَ مردم سی ٹی ڈی ءُ وفاقی ادارھانی زندانانی تہ ءَ بندیگ انت –