شال ریڈزون ءَ برجاھیں بیگواھیں مردمانی کھول نندانک ءَ مروچی چل روچ سرجم بوتگ- مستونگ ءَ چہ زورانسری آوار جنی ءِ نشانگ کنگ بوتگیں لیویز کارندہ سعید احمد ءِ زورانسری آوار جنی ءَ نُھ سال سرجم بوگ ءَ چہ زھرشانی کنوکاں روانکے کش اِتگ وھدے کہ بلوچستان ءِ ضلع ھُزدار ءَ بیگواھیں آصف ءُ رشید بلوچ ءِ یل کنائینگ ءِ ھاتر ءَ زھرشانی ئیں روانکے ءُ زھرشانی بیت-
سربوتگیں ھالانی رِد ءَ شال ءَ زیارت وئیل ءِ بگیری ءَ گورنر گس دیم ءَ برجاھیں بلوچ بیگواھیں مردمانی کھول زھرشانی ئیں نندانک ءَ مروچی چل روچ سرجم بوتگ- مروچی مستونگ ءِ جھمنندیں زورانسری آوار جنی بوتگیں سعید احمد ءِ بیگواھی ءَ نُھ سال سرجم بوگ ءَ چہ آئی ءِ مات ءِ دزبندی ءَ ریڈزون گورنر گس دیم ءَ یک پر ایمنی روانکے کشگ بوتگ-
نندانک ءَ ساڑی ئیں سعید احمد ءِ مات کہ آ بنداتی روچ ءَ چہ نندانک ءَ ھوار اِنت آئی ءَ گوں ھکومت ءُ انسانی ھکانی ادارھاں چہ بیگواھیں چک ءِ یل کنائینگ ءِ لوٹ کتگ-
بیگواھیں سعید احمد ءِ مات ءَ گْوشتگ کہ سعید احمد گوستگیں نُھ سالاں چہ زورانسری آوار جنی ءِ نشانگ اِنت ھمے میان ءَ سعید ءِ یل کنائینگ ءِ ھاتر ءَ سرجمیں راہ ءُ راھبنداں شتگ ایں، شال ءَ بگر تاں اسلام آباد ءَ نندانک داتگ وزیراعظم پاکستان ءَ گوں گند ءُ نند کتگ، کمیشنز ءَ کیس نکش کتگ بلے سعید احمد دیم ءَ نیاورتگ اںت ناں تاں مروچی مارا گوشگ نہ بوتگ آ کجا اِنت-
سعید احمد مات ءَ گْوشتگ کہ سعید احمد لیویز کاردارے اگاں چُک سر ءَ کجام وڑیں بھتامے ھست گُڑا آمیدگس ءَ پیش بہ کن اِت آئی وتی راستی ءِ پدر کنگ ءِ وھد بدے اِت-
ھمے وڑ مروچی نندانک ءَ اے این پی ءِ صوبائی صدر ءُ باسک صوبائی اسمبلی اصغر خان اچکزئی، صوبائی جنرل سیکرٹری مابت ماما ءَ بھر زرتگ ءُ بلوچ بیگواھیں مردمانی کھول گوں یکجاھی کتگ اِت-
شال ءَ نندانک ءَ ھوار زھرشانی کنوکانی گْوشگ رِد ءَ باندا بیگاہ ءِ ادار چار ءَ نندانک جاہ ءِ سر ءَ زورانسری آوار جنی ءِ میان اُستمانی روچ ءِ درگت ءَ چہ یک سیمینارے برجم دارگ بوگ ءَ اِنت چریشی ءَ سیاسی پارٹیانی رھشون، نامدار ایں وکیلیں اھوالکار ءُ انسانی ھکانی رھشون تران کن اَنت-
وھدے کہ باندا سے شمبے 30 اگست ءَ بلوچستان ءِ ضلع ھُزدار ءَ بیگواھیں رشید ءُ آصف ءِ یل کنائینگ ھاتر ءَ کھول نیمگ ءَ چہ زھرشانی ئیں روانکے ءُ زھرشانی کنگ بیت-
زانگ بہ بیت آصف ءُ رشید آیانی دگہ نُھ سنگتانی ھمراھی ءَ 31 اگست 2018 ءَ نوشکی ءِ نامدار ایں پکنکجاہ ءَ زنگی ناوڑ ءَ زورانسری آوار جتگ اَنت کہ ھمراھانی آوار جنگ ءَ بیگواہ بوتگیں سرجمیں مردم وھد وھد سر ءَ یل کنگ بوتگ اَنت وھدے کہ آصف ءُ رشید انگت بیگواہ ءَ اَنت-
براتانی زورانسری آوار جنی ءَ پد آیانی گْھار سائرہ بلوچ ءَ زھرشانی اِنت، گونر گس دیم ءَ نندانک ءَ سائرہ بلوچ بنداتی روچ ءَ ھوار بوتگ-