بلوچستان ءَ ھار آماچیں مھلوک ءِ کمکی کار برجاہ، نودربراں بلنگور ءَ کمکی کار بندات کتگ اَنت

کیچ ءِ دمگ بلنگور ءَ نودربراں نگور ءِ بازیں میتگاں لوگ پہ لوگ ءَ شُتگ ءُ پہ ھار جتیں بلوچ مھلوک ءِ ھاتر ءَ چندہ پُڑی گپتگ ، نودربرانی چندہ گرگ انگت برجاہ انت-

دمگی اھولکار ءِ رِد ءَ چنڈہ پڑی ءُ کمک گرگ گوستگیں روچ ءَ بزان بیست ءُ ھشت اگست ءَ ماں بل نگور ءَ نودربرانی نیمگ ءَ چہ بندات کنگ بوتگ ءُ انگت برجاہ انت، نگور ءِ جھمنندیں مھلوک ءَ پہ ھار آماچیں مردمانی ھاتر ءَ جوانیں وڑے ءَ کمک کُتگ، آھاں شریں وڑے ءَ زر ءُ وردنی راشن، گُد ءُ کمبل دگہ بازیں مالی کمک کُتگ انت –

نودربرانی نیمگ ءَ ھار آماچیں مھلوک ءِ ھاتر ءَ یک کمکی بنجل ءِ ماں بلنگور ءَ اڈ دیگ بوتگ کہ اود ءَ یک لک ءُ ھشتاد ھزار کلدار جم کنگ بوتگ ھمے وڑ بل نگور ءِ کش ءُ کری دمگاں ھوار ٹالوی ءَ شست ءُ شش ھزار ھشت ءُ چِل ءُ پیروتگ ءَ ھپت ھزار کلدار جم کنگ بوتگ انت کہ اے وھدی نودربرانی بنجل ءَ ٹوٹل دو لک ءُ پنجاہ ءُ سَے ھزار ءُ ھشت سد ءُ چِل کلدار جم کنگ بوتگ ءُ ھنگت ھم لھتے میتگ بچ اِتگ کہ مروچی ھما میتگاں نودربر پہ چندہ پڑی ءَ رو انت – آھانی گوشگ انت کہ زراں ابید بلنگور ءِ مھلوک ءَ پہ ھار آماچیں بلوچانی ھاتر ءَ دگہ اژدری سامان بزاں کمبل گُد ءُ وردنی سامان ھم داتگ کہ آ ھم بنجل ءَ جم کنگ بوتگ انت کہ زوت ھار جتیں بلوچ مھلوک ءِ ھاتر ءَ دیم دیگ بنت انت –

زانگ بہ بیت اے وھد ءَ بلوچستان ناگیگیں ساھاتانی آماچ اِنت اود ءَ ھمک ھار آماچیں مھلوک ءِ چم پہ ھستو مندانی کمک ءَ راھیگ اَنت-