ترندیں ھور ءُ توپاناں ابید شال ءَ کھولانی زھرشانی نندانک برجاہ

بلوچستان ءِ بنجاھی شھر شال ءَ زیارت وئیل ءُ بیگواھیں مردمانی واستا کھولانی زھرشانی نندانک شال ءَ ریڈزون ءَ سِی ءُ ھپتمی روچ ءَ برجاہ –

زھرشانی نندانک گوستگیں سِی ءُ ھپت روچ ءَ پیسر بندات کنگ بیتگ ءُ چریشی ءَ کھولاں جتا جتائیں وھداں شال ءِ دگانی سر ءَ زھرشانی کرتگ-

کھولانی گوشگ اِنت مزن واکدار داں دلجمیں سدکی نہ دنت داں ھما وھد ءَ اے زھرشانی نندانک برجاہ بیت اِنت –

بلوچستان ءَ کھر آماچیں ھور ءُ توپاناں ابید ھم کھول یکشل ءَ زھرشانی ءَ نیشتگ اَنت گوستگیں روچاں آیاں شال ءِ دو جاہ سرینا ھوٹل ءُ اسمبلی چوک ءُ جی پی او چوک بند کتگ ات اَنت پد ءَ ڈی سی شال ءَ گپ ءُ تران ءَ پد کھولاں زھرشانی نندانک سرینا چوک ءُ جی پی او چوک ءَ ھلاس کتگ اَت-

کھولانی گوشگ اِنت ڈی سی ءِ گوشگ ءَ پد ما آئی ءِ ودار کرتگ کہ آئی ءَ گوشتگ من شمارا مزن واکداراں گوں گند ءُ نند کنائیناں بلے آئی ءَ وتی کرتگیں زبان سرجم نہ کتگ-

اے زھرشانی نندانک ءَ پیر ءُ آجزیں مات ءُ زھگ ھوار اَنت کہ آ ھورانی سبب ءَ مزنیں نادراھیانی ھم آماچ بیان اَنت گوستگیں شپ ءَ بیگواھیں شبیر بلوچ ءِ گوھار سیما بلوچ ءِ جاور ناگتی ناگیگ بیتگ اَت ءُ آئی ءَ پد آ نادراہ جاہ ءَ برگ بیتگ ات-