شال: بلوچ نیشنل موومنٹ (بی این ایم) ءِ جارکش ءَ وتی درشان ءَ گْوشتگ مستونگ ءَ پاکستانی لشکر ءَ ارش کرتگ ءُ یکیں کھول ءِ 8 کس پہ زور بیگواہ کرتگ چہ ایشاں دو جاہ پہ جاہ شھید کنگ ءُ آیانی کنٹ بیگواہ کنگ بیتگ اَنت۔ مستونگ ءَ شھرمنندانی لوگ ءِ سر ءَ پاکستانی لشکر ءِ اُرش ریاستی زوراکی ءِ دْرچ اِنت۔ ھمے ماہ ءَ اے سیمی رند اِنت کہ پاکستانی لشکر ءَ دست ءُ گوشیں شھرمنندانی سر ءَ ارش کرتگ ، مردم کشتگ ءُ پہ زور بیگواہ کرتگ اَنت۔
آئی ءَ گْوشتگ چہ اے کاراں بلوچستان ءَ مردمی اگبالانی ناگیگیں جاورانی درانگازی بیت۔ بی این ایم ایشی ءَ گوں تْرندیں دانکاں ایرجنت ءُ گوں مردمی اگبالانی پانکجناں دزبندی کنت کہ آ ایشی ءَ پاکستان ءِ تھی جیڑہ ءِ رنگ ءَ مہ چار اَنت یا ڈالچار مہ کن اَنت بلکیں ایشی ءَ مردمی جیڑھے ءِ وڑ ءَ بہ چار اَنت ءُ زیت دزمانجنی بہ کن اَنت۔
آئی ءَ گْوشتگ کلی شادی ھان پڑنگ آباد مستونگ ءَ واندہ ءُ چاگرد ءِ پرمنگھیں کھولے ءِ سر ءَ چار شمبے ءُ پنچ شمبے ءِ میانی شپ ءَ پاکستانی لشکر ءَ گوں مزنیں سلاھاں ارش کرتگ۔ آیانی لوگ ءِ سر ءَ گوں وتکاریں سلاھاں ارش کنگ بیتگ ءُ مارٹر جنگ بیتگ۔
’اے ارش ءَ مستونگ کالج ءِ پیسرگیں پرنسپل ءُ نامی ئیں نبشتہ کار پروپیسر سالھ مھمد شاد، نامی ئیں سیاسی مردم چیپ اتاء اللہ بلوچ ایڈوکیٹ ، آئی ءِ پت مھمد گل شاھوانی، آئی ءِ برات نجیب اللہ شاھوانی، سیپ اللہ شاھوانی، مجیب الرھمان شاھوانی ، براھمدگ شاھوانی ، سلاہ ادین شاھوانی ءُ سلمان شاھوانی آزار دیگ ءُ پہ زور بیگواہ کنگ بیتگ اَنت۔‘
آئی ءَ گْوشتگ ھمے ماہ ءَ 2 اگست ءَ ھاران ءِ جنگل دگ ءَ ھاجی سناء اللہ شاھوانی ءِ لوگ ءِ سر ءَ ھم پاکستانی لشکر ءُ گوں آئی ءَ ھمگرنچیں ادارھاں ارش کرتگ ءُ دست ءُ گوشیں مردمانی سرءَ وتکار ءُ مزنیں سلاہ کارمرد کرتگ۔ آئی ءِ دو چک آمرشاھوانی ءُ امران شاھوانی آزار داتگ ءُ شھید کرتگ اَنت وھدے کہ آئی ءِ دگہ چکے ارپان شاھوانی پہ زور بیگواہ کرتگ۔
جارکش ءَ گْوشتگ پاکستانی لشکر ماں بلوچستان ءَ وت ءَ چہ ھمک جست ءُ پرس ءَ آجو سرپد بیان مردمانی بگیری ءَ ناراھیں رنگے ءَ زور کارمرد کنگ ءُ مردمانی کشگ ءَ ھچ چک ءُ پد نہ بیگ ءَ اِنت۔ 14 اگست ھوست ھرنائی ءَ ایپ سی ءِ کارپدانی بگیری ءَ مردماں زھرشانی کرتگ چہ ایشی ءَ ایپ سی ءَ مردمانی سر ءَ تچکے ءَ تیرگواری کرتگ۔ چہ ایپ سی ءِ تیرگواری ءَ ھالکداد بابڑ جاہ پہ جاہ شھید بیتگ وھدے کہ دو چکانی پجیگ ءَ دگہ مردم ٹپی بیتگ اَنت۔
جارکش ءِ رد ءَ سلاہ ادین شاھوانی ءُ سلمان شاھوانی پاکستانی لشکر ءِ ارش ءَ ٹپی بیگ ءَ پد شھید بیتگ اَنت آیانی کنٹ باز دیر ءَ پد چہ شھرمنندانی زھرشانی ءَ ھندی سروکیں مردمانی دست ءَ بیتگ اَنت۔ھمے میان ءَ پروپیسر سالھ مھمد شاد ءُ پیرمردیں مھمد گل شاھوانی سکا ٹپ ءُ ٹوریں جاوراں شال ءِ ٹراما سینٹر ءَ برگ بیتگ اَنت۔ ھر دو سک ٹپی اَنت بلے انگت سی ٹی ڈی ءِ دست ءَ اَنت ءُ آیانی دستاں دزبند جتگ۔سانمندیں کھول ءِ دگہ چار کس دنیگت پہ زور بیگواہ اِنت۔
آئی ءَ گْوشتگ شال ءَ پہ زور بیگواھیں مردمانی کوش ءُ ھرنائی ءَ تچکے ءَ نشانگ کنگ ءُ دست ءُ گوشیں مردمانی سر ءَ تیرگْواری کنگ ءُ کشگ ءِ بگیری ءَ مردم زھرشانی کنگ ءَ اَنت۔نام ءِ واکدار اے زھرشانی کنوکیں مردمانی دروگیں دلبڈی دیگ ءَ اَنت بلے لشکر ءَ راہ ءُ راھبندانی پابند کنگ ءَ بے سوب اَنت۔پاکستانی لشکر انگار چہ ایشی ءَ پہ زوریں بیگواھیاں کم بہ کنت نی شھرمنندانی لوگانی سر ءَ ارش ءَ بنا بیتگ۔
’24 اگست ءَ چہ پشتون آباد شال ءَ انایت اللہ گبیرزھی سی ٹی ڈی ءِ کارمنداں دگہ دو مردمانی پجیگ ءَ دزگیر کرتگ ءُ ھمے روچ ءِ بیگاہ ءَ انایت اللہ کشتگ ءُ آئی ءِ کنٹ آئیءِ کھول ءِ مردمانی دست ءَ داتگ۔‘
جارکش ءَ گْوشتگ ڈنڈار ءِ ھند نگور ءَ پاکستانی لشکر ءِ بنجل ءِ نزیک ءَ پاکستانی لشکر ءِ چیردستیں مردم کشیں رمب ءِ چریکاں گاڑی یے نشانگ کرتگ ایشی ءِ تہ ءِ لاپ پریں جنینے ھم سوار بیتگ کہ آئی ءَ ڈنڈار ءَ پہ الاج ءَ برگ ءَ بیتگ اَنت۔ پاکستانی لشکر ءِ مردم کشیں رمب ءَ کوروکائی تیرگواری کرتگ چہ ایشی ءَ لاپ پریں جنین گوں وتی لاپ ءِ چک ءَ ھما دمان ءَ شھید بیتگ وھدے کہ دگہ چکے ءُ دگہ دو مردم سک ٹپی بیتگ اَنت۔
آئی ءَ گْوشتگ تیوک ءَ ھمے ماہ ءَ ھپت کس پاکستانی لشکر ءُ آئی ءِ چیردستیں تواناں تچکے ءَ تیرگواری کرتگ ءُ کشتگ وھدے کہ دھاں مردم پہ زوربیگواہ کرتگ ءُ چہ ایشاں باز ءِ سر ءَ دورگیں کیس ھم جنگ بیتگ۔
جارکش ءَ گْوشتگ یک نیمگے بلوچستان ھار ءِ آماچ اِنت۔نیم ءَ گیش بلوچستان سرجم ءَ تباہ بیتگ ءُ دومی نیمگ ءَ پاکستانی لشکر زوراکی کنگ ءُ مردماں کشگ ءَ اِنت۔ پاکستانی لشکر ءَ چہ وتی زوراکیاں بلوچستان کوش جاھے جوڑ کرتگ ءُ اد ءَ پاکستانی لشکر ھم روچ مردماں کشگ ءُ چگل دیگ ءَ اِنت۔