شال ءِ نندانک ءَ ھواریں بیگواھیں مردمانی کھولانی جاور نگیگ بوان انت

شال ءَ بازیں روچ ءِ بیت کہ ھئور یکشل ءَ رِچگ انت کہ چریشی ءَ پچیں آزمان ءِ چیر ءَ نندانک ءَ نشتگیں زھگ ءُ زالبولانی جاور نگیگ بوان انت –

بازیں ھئورانی سوب ءَ موسم ھراب بوان انت گوستگیں سِی ءُ شش روچاں ریڈ زون ءَ گورنر کارگس ءِ دیم ءَ زھرشانی ءَ نشتگیں شبیر بلوچ ءِ گھار سیما بلوچ ءِ جاور مروچی اناگتی ھراب بوتگ کہ بیھوشی ءِ جاوراں گوں نزیکیں نادراھجاہ ءَ برگ بوتگ –

کھولانی رِد ءَ نندانک ءَ نشتگیں ایندگہ زھگ ءُ زالبول ھم نادراھیانی آماچ بوتگ انت –

زانگ بہ بیت بیگواھیں مردمانی کھولاں سِی ءُ شش روچ انت کہ بلوچستان گورنر کارگس ءِ دیم ءَ بنجل جتگ ءُ نشتگ انت – بیگواھیں مردمانی کھول وتی دوستیگیں مردمانی یل کنگ ءِ لوٹ ءَ کنگ ءَ انت –

شال ءِ نندانک گوستگیں ماہ ءَ زیارت ءِ وئیل ءَ پد برجم کنگ بوتگ – بیگواھیں مردمانی کھولاں وتی سَے لوٹ بلوچستان سرکار ءِ دیم ءَ ایر کُرتگ انت کہ آئی ءِ تہ ءَ زیارت ءِ وئیل ءِ سر ءَ جوڈیشل کمیشن ءِ اڈ دیگ، بیگواھیں مردمانی یل کنگ ءُ بیگواھیں مردمانی کھولاں باور کنائینگ کہ دیمتر ءَ دروگیں میڑ ءِ نام ءَ زورانسری آوار جنگ بوتگیں مردم کُشگ نہ بنت –

کھولانی لوٹ اِنت کہ آرمی چیف کھولاں گوں دچار بہ کپ ایت آھاں باور بہ کنائینیت کہ مردم یل کنگ بنت گڈا زھرشانی ھلاس کنگ بیت اِنت –

نندانک ءَ ھواریں بیگواھیں ڈاکٹر دین محمد ءِ زھگ سمی دین بلوچ ءَ گوشتگ کہ سرکاری اگدہ دار وت ءَ شوک کن انت ءُ بیست ملٹ ءِ ھاتر ءَ مئے پتر ءِ سر ءَ کائنت ءُ ھمے گوش انت کہ ما شمے گوم ایں بلے اے توپانی ھئوراں وتی گسانی تہ ءَ وش واب انت ءُ مئے مات آھانی دروازگ ءِ دپ ءَ وتی تمبوانی چیر ءَ آپ ءِ تہ ءَ نشتگ انت –

سمی بلوچ ءَ دیمتر ءَ گوشتگ کہ ھما کہ واکدار انت بلوچستان ءِ تہ ءَ آئی ءَ واکداری نیست اِنت پہ گند ءُ نند ءُ نام ءَ چدوگیشتر مردماں رد مہ دئیت –