ھمدرد فاؤنڈیشن بلوچستان ءِ نیمگ ءَ وندر، ھب ءُ کراچی ءِ جُتا جُتائیں جاھاں سیلاب آماچیں لس مھلوک ءِ واستا برجم داشتگیں کُمکی بُنجل ءِ دومی روچ گْوں سوبمَنْدی ءَ آسر بوتگ اَنت۔
بلوچستان ءَ کمکی گل ھمدرد پاؤنڈیشن ءَ وتی شنگ کرتگیں درشان ءَ گوشتگ کہ بلوچستان ءِ تہ ءَ انوگیں سیلاب ءِ زوالکاریانی سوب ءَ بازیں ھند تباہ بوتگ انت۔ لس مھلوک بے گسی ءَ وتی زندمان ءِ روچاں گْوازینگ ءَ اَنت ءُ آیاناں بنکی آسراتی دیگ بوگ ءَ نہ اِنت۔
آئی ءَ گوشتگ کہ سیلاب ءِ آماچیں لس مھلوک ءِ واستا مروچی ھب چوکی لسبیلہ پریس کلب ءِ دیم ءَ برجم داشتگیں کمکی بنجل ءِ دومی روچ گْوں سوبمَنْدی ءَ آسر بوت۔ وندر ءُ کراچی ءِ جتا جتائیں جاھاں ھمدرد فاؤنڈیشن ءِ نیمگ ءَ کمکی بنجل برجم دارگ بوتگ۔
آئی ءَ گوشتگ اِے کمکی بنجلاں بنی آدم دوستی ءِ بنیات ءَ لس مھلوک ءَ اھتگ ءُ مالی کمک کرتگ باند ءَ پہ سلامتی ھب چوکی، نیول ءُ کراچی ءِ جتاجتائیں جاھاں ھم کمکی بنجل برجم دارگ بیت۔ تیوگیں ھستگاریں لس مھلوک ءَ گْوں دستبندی اِنت کہ آ بنی آدم دوستی ءِ بُنیات ءَ بْیا اَنت ءُ کمکی بُنجل ءَ لس مھلوک ءِ مالی کمک ءَ بہ کن اَنت۔