بلوچستان ءَ دگہ دو مردماں وتکشی کتگ

سربوتگیں ھالانی رِد ءَ مروچی سَے شمبے ءِ روچ ءَ بلوچستان ءِ دو جتا جتائیں دمگاں دگہ دو ورنایاں وت کُشی کُتگ-

چار روچانی میان ءَ اے دوئیں ورناھانی وتکُشی ءَ پد سرجمی ءَ پنچ مردماں وتکُشی کُتگ –

وتکُشی کنوکانی تہ ءَ پنجگور ، نوشکی ءُ پسنی ءَ یک یک مردمے ءَ وتکُشی کُتگ وھدیکہ تربت ءَ دو مردماں وتکشی کُتگ – وھدیکہ بلوچستان ءِ دمگ وڈھ ءَ سربوتگیں ھالانی رِد ءَ آودا ھم یک مردمے ءَ وتکشی کنگ ءِ جُھد کُتگ –

مروچی وتکشی کنوکانی تہ ءَ حمید ء محمد جان جھمنند پسنی کلانچ ءُ سنی ء رحمت جھمنند تربت گھنہ ھوار انت –

زانگ بہ بیت بلوچستان ءِ تہ ءَ وتکشی کنوکانی کچ روچ پہ روچ گیش بوان انت بلے تنی وھدی سرکار ءِ نیمگ ءَ وتکشی گرءُ دار ھاتر ءَ ھچ وڈیں گامگیج زورگ بوگ ءَ نہ انت ءُ آ بس ھاموش انت ءُ ندارگ چارگ انت-