مروچی پد ءَ بیگواھیں مردمانی کھولاں شال ءِ جتا جتائیں چار راہ بند کتگ اَنت

بلوچستان ءِ بنجاھی شھر شال ءَ زھرشانی نندانک ءَ سی ءُ چار روچ سرجم بیتگ ءُ مروچی کھولاں وتی زھرشانی نندانک گیش جنزیتگ ءُ شھر ءِ دگہ دگہ جاہ بند کتگ اَنت-

سر بیتگیں اھولانی رد ءَ پولیس ءُ زالبولیں پولیس ھم زھرشانی جاہ ءَ سر بیتگ اَنت-

بلوچستان ءِ بنجاھی شھر شال ءَ گوستگیں سی ءُ سَے روچاں بیگواھیں مردمانی کھولانی نندانکی زھرشانی مروچی یک برے پد ءَ جنز اتگ ءُ شال ءَ اسمبلی چوک ءُ جی پی او چوک پد ءَ بند کتگ ءُ ھر وڑیں روانی مھتل کتگ اَنت-

زھرشانی ءِ سبب ءَ شھر ءِ مردمانی واستا دگ ءِ بند بیگ یک جنجالے جوڑ بیتگ ءُ ھر نیمگ ءَ گندگ ءَ کیت گاڑی ءُ پرپٹانی کتار اَنت-

کھولانی گوشگ اِنت سرکار مارا گوشدارگ ءَ نہ اِنت ءُ چریشی ءِ سبب ءَ ما لاچار اِنت کہ وتی ھکانی ھاتر ءَ دیمترا بہ جنزیں-

گوستگیں روچ ءَ ھم کھولاں جی پی او چوک بند کتگ اَت پد ءَ دمگدار ءِ گوشگ ءَ آیاں چوک پچ کتگ ات-

کھولانی گوشگ اِنت شال ءِ ڈی سی شے ھک ءَ زبان کتگ کہ آ شمئے گپ ءِ گوشداروک ءُ آیانی لوٹانی منوکاں دچاری کنائینت بلے آئی ءَ وتی زبان سرجم نہ کتگ ات ءُ چریشی ءَ چہ مروچی پد ءَ کھول برانز گپتگ ءُ دیم ءَ جنز اتگ اَنت-

زانگ بہ اے زھرشانی نندانک زیارت ءَ یازدہ مردمانی کوشاں پد جنگ بیتگ ءُ کھولانی گوشگ اِنت کہ اے مارا ھم ترس اِنت کہ گمان ھمے بیت اِنت مئے بندیگیں مردم ھمے وڑ ءَ دروگیں میڑانی نام ءَ جنگ ءُ چگل دیگ بنت-