بلوچستان ءَ وتکشیانی وئیل گیشتر بیان اَنت، سئے روچانی تہءَ سئے مردماں وتکُشی کُتگ وھدیکہ یک مردمے ءَ وتکُشی ءِ کوشست کُتگ ۔
بلوچستان ءَ چہ ھمک روچی ردءَ وتکشیانی وئیل دیما پیداک اَنت، گوستگیں سئے روچانی تہءَ بلوچستان ءِ سئے جتاھیں دمگ نوشکی، تُربت ءُ پنجگور ءَ سئے کیس نبشتہ بیتگ اَنت، کہ آودہ سئے مردماں وتکُشی کُتگ ءُ یک مردمے ءَ وتکُشی کنگ ءِ کوشست کُتگ۔
دو روچ پیسر تُربت ءِ ھند جوسک ءَ رجب ء الہی بخش نامی ورنایے ءَ وتءَ تیر جتگ ءُ وتی زند آسر کُتگ، اِشی ءَ ابید گوستگیں روچاں نوشکی ءِ جھمنندیں ورناہ نجیب ء بلال ءَ ھم وتکُشی کُتگ اَت۔
انی نوکتریں سربیتگیں اھوالانی ردءَ پنجگور ءُ وڈھ ءَ ھم دو کیس دیما اتکگ کہ ایشانی تہءَ یکے ءَ وتکُشی کُتگ ءُ دومی ءَ کوشست کُتگ۔
پنجگور ءِ ھند بونستان ءَ شعیب ء حاجی انور نامی مردمے ءِ وتکُشی ءِ ھال اِنت وھدیکہ وڈھ ءِ جھمنندیں مردمے ءَ زیک وتکُشی ءِ کوشست کُتگ، کہ آ نگیگیں جاورانی تہءَ سول ھسپتال خضدار ءَ برگ بیتگ۔