واکدارانی سدکی دیگ ءَ پد لوٹانی سر ءَ نا دلجمی ءَ بیگواھیں مردمانی کھولاں مروچی دوبر وتی زھرشانی جنزینگ ءِ گمان داتگ-
وائس فار بلوچ مسنگ پرسنز ءِ رھشون سمی دین بلوچ ءَ ٹوئٹر ءَ یک ٹوئٹے ءَ گشتگ گوستگیں روچ ءَ ڈی سی شئے ھک بلوچ ءِ گپ ءِ سر ءَ ستک کتگ ما وتی نندانک جی پی او چوک ءَ ھلاس کتگ – آئی ءَ گُشتگ مئے لوٹانی منگ ءَ کورکمانڈر ءِ گند ءُ نند ءَ المی کن آں اے گپ ءِ راستی ءَ داں شپ ءِ یازدہ ءَ کن ایں-
سمی دین ءَ گشتگ کہ ما شپ ءَ بازیں اداراں داں ودار کتگ بلے کس نیتکگ – مروچی دوبر ما نندانک ءَ جنزین اِنت-
سمی دین ءَ گوشتگ دراھیں ھمراھاں گوں دزبندی کن آں مئے ھمراھداری ءَ بہ کن اَنت مئے زور جوڑ بہ ببت مروچی یازدہ ءَ گورنرھاؤس ءِ دیم ءَ جاڑیگ ایں دانکہ ما وتی زھرشانی ترند بہ کن ایں ءُ شمے پلامرزی ءَ زھرشانی ءَ سوبمند بہ کن ایں-
زانگ بہ بیت گوستگیں یک ماھے ءَ گیش اِنت بیگواھیں بلوچانی کھول بنجاھی شھر شال ءَ ریڈزون ءَ گورنرھاؤس ءِ دیم ءَ نیشتگ ءُ زھرشانی کنگ ءَ اَنت- زھرشانی کنوک زیارت بیڑ ءُ دروگیں میڑ ءِ نام ءَ بیگواھیں مردمانی جوڈیشل کمیشن ءِ لوٹ ءِ ھمراھی ءَ دوستگیں مردمانی یل کنگ ءِ لوٹ ءَ کنگ ءَ اَنت-
گوستگیں روچ ءَ کیچ ءِ بنجاھی شھر تربت ءَ سوسل سوسائٹی ءَ زھرشانی کنوکانی گون ءَ ھمدردی کنگ ءَ یک روچی زھرشانی بنجلے جتگ ات ھمے وڑ جرمنی ءَ بلوچ نیشنل مومنٹ ءِ نیمگ ءَ بلوچستان ءَ انسانی ھکانی پادمالی ءُ شال ءَ زھرشانی نیشتگیں کھولانی گون ءَ ھمدردی ءِ واستا سرپدی مھم کتگ-