گوادر ءَ پوج ءَ دھ مردم آوار جتگ ءُ بیگواہ کتگ انت، کوسٹل ہائی وی سر ءَ نندانک برجاہ

بلوچستان ءَ زورانسری آوارجنیانی درچ یکشل ءَ برجاہ انت، نوکتریں ھالانی رِد ءَ پاکستانی پوج ءَ بلوچستان ءِ تیاب دپی دمگ گوادر ءَ دگہ دھ مردم زورانسری آوار جتگ ءُ بیگواہ کتگ انت –

بیگواھیں مردمانی زورانسری آوار جنی ءِبگیری ءَ حق دو تحریک ءِ سروک ملا ہدایت الرحمن چیردستی ءَ مزنیں کچ ءَ مردماں کوسٹل ہائی وے سر ءَ نندانک جتگ ءُ نشتگ انت –

بلوچستان ءَ زورانسری آوارجنیانی بگیری ءَ توار چست کنوکیں گل وائس فار بلوچ مسنگ پرسنز ءَ چہ گوادر ءَ زورانسری آوار جنگ بوتگیں مردمانی ھال راست کُتگ چاگردی ترامجاھاں شنگ کرتگیں وتی درشان ءِ تہ ءَ گوشتگ کہ گوادر ءِ جتا جتائیں دمگاں یکیں ھپتگے تہ ءَ دھ ءَ گیش ورناھانی زورانسری آوار جنی ءِ ھال مارا رستگ انت –

وی بی ایم پی ءِ رِد ءَ آوار جنگ بوتگیں مردمانی تہ ءَ ھپت مردمانی پجار بوتگ انت کہ آھانی نام ساحل امین، سمیر ھمزہ، بالاچ ء حاجی سلیمان، مزمل، کچکول، علی جما ءُ احسان ء فقیر محمد انت –

دومی نیمگ ءَ کوسٹل ہائی وے سر ءَ حق دو تحریک ءِ نندانک برجاہ انت – درنگاز کنوکانی گوشگ انت کہ گوستگیں روچاں چہ گوادر ءَ ورنا آوار جنگ ءُ بیگواہ کنگ بوتگ انت مئے نندانک تاں ھما وھد ءَ برجاہ بیت تانکہ ورنا یل کنگ نہ بنت –

دمگی اھوالکارانی رِد ءَ اے ورنا گوستگیں روچاں پاکستانی پوج ءَ گوادر ءِ دمگ ملا بند، فقیر کالونی، نیا آباد، ٹی ٹی سی کالونی، مونڈی، سُر، نگور ءَ ھوار دگہ دمگاں بیڑ برتگ ءُ آوار جتگ انت –