کیچ ءُ پنجگور ءَ سیمسر ءِ بند بوگ ءِ ھلاپ ءَ مھلوک ءِ زھرشانی

بلوچستان ءِ بھر کنوکیں لکیر ءِ بندش ءِ ھلاپ ءَ تمپ ءَ روانک، پنجگور ءَ کار ءُ باری مھلوک ءَ زھرشانی کرتگ-

گیشیں ھالانی رد ءَ پنجگور ءِ لس مھلوک ءُ سیانی پاٹیانی نیمگ ءَ سیمسر ءِ بند بوگ ءِ ھلاپ ءَ گوستگیں یک ماھے ءَ زھرشانی درچ یکشل ءَ برجاہ اَنت ءُ مروچی زھرشانی کنوکاں پنجگور بسم اللہ چوک ءَ یک روانکے کش اتگ ءُ ڈپٹی کمشنر ءِ کارگس ءِ دیم ءَ نندانک جتگ-

پنجگور ءَ زھرشانی کنوکاں سیمسر ءِ پچ کنگ ءُ مھلوک ءِ روزگار ءِ سرجم کنگ ءُ بارڈر کمیٹی سسٹم ءِ ھلاس کنگ ءَ ھوار ٹوکن ءُ اسٹیکر ءِ نام ءَ لس زوراکانی پنجگ ھلاس کنگ بہ بیت-

پنجگور ءِ سیمسر ءَ ھواریں کار ءُ باری مھلوک گوستگیں بازیں روچاں زھرشانی کنگ ءَ اَنت – زھرشانی کنوکاں ڈی سی کارگس ءِ دیم ءَ سیمسر ءِ پچ کنگ ءِ لوٹ ءَ داں نندانک ءِ جار جتگ-

دومی نیمگ ءَ کیچ ءِ دمگ تمپ ءَ ایرانی سیمسر ءَ ھواریں کار ءُ باری مردمانی نیمگ ءَ یک پر ایمنیں روانکے کشگ بیتگ روانک ءِ مھلوک ءَ انتزامیہ ءِ ھلاپ ءَ اوگام جتگ-

زھرشانی کنوکانی گوشگ اِنت لیویز ءِ کارندھانی سروکی ءَ سیمسر ءَ ھلوکیں گاڑیاں ملام گرگ ءَ اَنت ءُ ٹوکن ءِ کار ءُ بار سر ءِ زور ءَ اِنت- تمپ ءِ گاڑیانی نمبر ماھے ءَ رند کیت اِنت سیمسر ءَ گوزگ ءَ دگراں کل اَنت زھرشانی کنوکاں بھتام جتگ کہ اے درستیں کار ءُ بار ڈپٹی کمشنر کیچ ءِ سروکی ءَ بیگ ءَ اَنت-

زھرشانی کنوکانی گوشگ ات کہ انتزامیہ ءِ زرواری سر ءَ زور اَنت ءُ تمپ ءِ مھلوک ءِ کار ءُ بار کنگ ءَ اجازت دیگ بیگ ءَ نہ اِنت آ دگہ جاھانی گاڑی چشکہ کراچی، ھزدار، آواران، ھاران، شال ءِ گاڑی تمپ ءِ سیمسر ءَ گوزگ ءَ اَنت کہ اے دمگی مردمانی گون ءَ ناانساپی یے-

زھرشانی کنوکاں گوشتگ کہ دمگداراں عبدوی ءِ سیمسر تباہ کتگ ءُ ھر روچ کرپشن ءُ ھمک روچ یک گاڑی ءَ دہ ھزار ءُ بیست ھزار ملام گرگ ءَ اَنت چشکہ اے یک زوراکی یے ءُ مئے روانک ءِ پرایمنی ءِ مول ءُ مراد ایش اِنت کہ مارا انتزامیہ لاچار مہ کنت-

زھرشانی کنوکاں گوشتگ کہ سرکار ءُ دمگداراں گوں دزبندی اِنت کہ عبدوی سیمسر ءِ جیڑہ ءَ کمشنر مکراب ءُ مزنیں واکدار ڈپٹی کمشنر کیچ ءِ چیردستی ءَ ھستیں انتزامیہ ءِ رویش ءِ سر ءَ گامگیج بہ زور اِیت-