بیگواھیں مردمانی کھولانی نیمگ ءَ شال ءَ جی پی او چار راہ بند کنگ بیتگ

بلوچستان ءِ بنجاھی شھر شال ءَ زیارت وئیل ءَ پد جنگ بیتگیں زھرشانی بنجل ءَ سِی ءُ سَے روچ سرجم بیتگ کہ زھرشانی کنوک ریڈزون ءَ نشتگ اَنت ءُ مروچی کھولاں ریڈ زون ءِ ھواری ءَ جی پی او چار راہ ھم بند کتگ-

کھولانی گوشگ اِنت کہ گوستگیں یک ماھے ءَ گوزگ ءَ پد ھم سرکار مئے لوٹانی سر ءَ دلجمی ءَ دلگوش نہ اِنت چریشی ءَ ما لاچار اِنت کہ وتی نندانکاں گیش دیمتر ءَ بہ بریں –

جی پی او چار راہ ءِ سر ءَ یک ویڈیو کلوھے ءَ بیگواھیں ڈاکٹر دین مھمد ءِ جنک ءُ وی بی ایم پی ءِ رھشون سمی دین بلوچ ءَ گشتگ کہ گوستگیں روچ ءَ سرکاری ٹولی ءِ کلوہ آروکیں کاسد اتکگ اَنت بلے آیاں مارا دلجمیں گپ ءِ گوشگ ءَ ابید نندانک ءِ ھلاس کنگ ءِ کڈن کتگ-

سمی دین بلوچ ءَ گشتگ کہ گوستگیں ماھے ءَ گیش اِنت کہ بیگواھیں مردمانی پنجاہ کھول ءَ گیش اے نندانک ءَ ھوار اَنت ءُ آ وتی مردمانی پھریزگ ءِ واستا پریات کنگ ءَ اَنت بلے بے وس ءُ ٹگیں سرکار انگت ءَ اشاں دیست کنگ ءَ نہ اِنت-

زانگ بہ بیت بلوچستان ءَ اے وھد ءَ ھار ءُ کھر آماچیں ھوراں سرجمیں بلوچستان وتی لپیٹ ءَ زرتگ ءُ چریشی ءِ سبب ءَ شال ءَ زھرشانی ءَ نیشتگیں کھول ھم ھمے کھر ءِ آماچ اَنت ءُ گوستگیں روچ ءَ آیانی تمبو ءُ اژدری سامان ھور ءَ مسینتگ اَنت-

زانگ بہ بیت گوستگیں روچ ءَ سرکاری ٹولی ءَ نودر مھمد دمڑ، بشرا رند ءُ شکیلہ نوید دھوار کھولانی نندانک ءِ ھلاس کنگ ءِ واستا سرکار ءِ کاسد بیتگ اِت اَنت کہ آیاں گشتگ اَت شما اے ھور ءُ ھراماں وتی نندانک ءَ ھلاس بہ کن ات ءُ وتی گساں بہ رو اِت پد ءَ دوبر بیا ات ءُ رند ءَ پرشما یک راھے گیشینگ بیت اِنت-

کھولاں وتی نندانک ءِ ھلاس کنگ ءَ ابید مروچی آیاں شال ءِ یک گچینی راھ جی پی او چوک بند کتگ ءُ آیاں گیش نندانک جنگ ءِ گپ ھم جتگ –