شال: تُرندیں ھور ءَ اَبید وی بی ایم ءِ زھرشانی برجاہ ءَ اِنت

وائس فار بلوچ مسنگ پرسنز ءِ شُدکُشیں ھڑتالی بُنجل ءَ 4736 روچ سرجم بوتگ، شال ءَ مروچی ھور سبب ءَ بُنجل ءِ نیم بھر آپ ءَ چہ پُر بوتگ ماما قدیر بلوچ سکیاں چہ اَبید بُنجل ءَ نشتگ-

ھمدردی درشان کنوکاں پی ٹی ایم پشین ءِ باسک نور محمد اچکزئی ، قطب خان کاکڑ ءَ ھوار دگہ سیاسی ءُ چاگردی باسکاں بھر زرتگ-

ھمے درگت ءَ وی بی ایم پی ءِ وائس چیئرمین ماما قدیر بلوچ ءَ گْوشتگ کہ پاکستانی ریاست ءَ بلوچ ڈیھ ءِ سر ءَ زوراکی ھد گوازینتگ- جھان ءِ کانود ءُ جینیوا کنونشن ءِ سر ءَ سر بگیری بوگ ءَ اِنت اکوام متھدہ دزمانجی بہ کنت اے ریاستی ناشرکاری ءَ گر ءُ دار کنگی اِنت-

آئی ءَ دیمتر ءَ گْوشتگ کہ بلوچستان ءَ پوج ءِ زوراکی، لشکر کشی ءِ نام ءِ سر ءَ مردمانی لوگاں ماندارگ، مردمانی بے کانودی ءَ آوار جنگ ءُ بیگواہ کنگ ءُ آیاں بے کانودی ءِ کُشگ ءِ دْرچ تُرندی ءَ برجاہ ءَ اَنت-