بلوچستان ءَ ھور ءُ گورانیاں دگہ نُھ مردم مرگ ءَ وتی ارجان جتگ اَنت

بلوچستان ءَ ھور ءُ گوارنیاں دگہ نُھ مردم بیران بیتگ اَنت، بیران بیتگیں مردمانی کچ دو سد ءُ شانزدہ ءَ سر بیتگ بیست ءُ شش ھزار ءُ پنچ سد گساں تاوانباری بیتگ اَنت-

کوژک ٹاپ، شاخہ ٹاپ، قلعہ عبداللہ گورانیاں چہ گیشتریں کور آپاں سریچ اَنت-

شال ءُ چمن ءِ شھدگ آپ ءَ بڈینتگ بازیں جاھاں دگ پرشت ءُ پروش ءِ آماچ، شال ءُ چمن ءِ میانی دمگ روگ ءُ آیگی راہ ءُ در بند بیتگ اَنت –

نوچکی بلغانی ءِ ھند ءَ کلی رشید ءِ پھازگی بند ءَ برتگ ھار میتگاں سر بیتگ ءُ بازیں لوگاں تاوان رس اتگ-

ھمے وڑ کوہ سلیمان ءِ کوھی دمگاں وھد وھد ءِ سر ءَ ھورانی گوارگ بندات اَنت، شیپ ءُ کور آپ ءُ تلاپ اَنت سیم نالہ مھمد پور گم ءَ پھازگی بند ءَ برتگ ءُ ھار نزیکیں میتگاں سر بیتگ-

اشی ءَ ابید پنجاب ءُ بلوچستان ءِ شھدگ چارومی روچ ءَ ھم بند اِنت، ڈیرہ اسماعیل خان ءِ کوھی دمگاں اتکگیں ھار ءَ تباھی کتگ –

چہ گوستگیں روچ ءَ ھورانی گوارگ ءَ بلوچستان ءِ رھوتی نزام درگان درگان کتگ اَنت پچ کنگ بیتگیں راہ ءُ در دوبر توپان ءَ وتی ارجان کتگ –

توپان ءِ سبب ءَ شال چمن ءِ شھدگ گوستگیں شپ ءَ شاخہ ءِ ھند ءَ توپان ءَ برتگ ءُ ھرچ رنگیں روانی مھتل ءُ اوگانستان ءَ ھم آیوکیں مال برداریں ٹرانسپورٹ بند بیتگ اَنت-

پی ڈی ایم اے ءَ یک اژدری ءِ شنگ کتگ کہ مروچی اُستان ءِ بازیں جاھاں ترندیں ھورانی گمان اِنت-

کلاوڈ برسٹ ءَ چہ شاخہ کور ءَ توپانی آپ لوھڑاں گون چست بیتگ – توپانی ھوراں کلات ءَ ھم یک ڈیمے ءَ برتگ-

پی ڈی ایم اے ءِ رد ءَ بولان ءُ یارو کاز وے ءَ توپانی ھار ءِ سبب ءَ این شست ءُ پنچ سندھ ءُ بلوچستان ءِ شھدگ، کرخ ھزدار ءِ ھند ءَ ایم ھشت ھزدار بسیمہ ایم سِی شھدگ توپانی ھار ءِ سبب ءَ بند اَنت-

ژوپ ڈی آئی خان ءَ این پنجاہ شھدگ شیرانی ءِ ھند ءَ دانہ سر ءَ، شال کراچی ءِ شھدگ این بیست ءُ پنچ لسبیلہ ءَ لنڈا پھل ءِ ھند ءَ ءُ این ھپتاد ءُ پنچ ءِ نزیک ءَ فورٹ منرو ءَ ھرچ رنگیں راہ ءُ در بند بیتگ اَنت-

پی ڈی ایم اے ءِ رد ءَ گوارانی ھوراں جعفر آباد، اوستہ مھمد، گنداخہ، بارکھان، ھزدار، نصیر آباد، چمن، سبی، ژوپ، لسبیلہ، پشین، لورالائی، مسلم باگ، کلات، شال، زیارت، قلعہ عبداللہ مزنیں کچے ءَ اسرمند کتگ اَنت ءُ مروچی پد ءَ بلوچستان ءِ بازیں جاھاں ترندیں ھورانی رگام ایر دے اَنت-