بلوچستان ءِ جتاھیں دمگاں ھور ءُ ھارانی سوب ءَ تباہ کاری برجاہ اِنت، نوکتریں ھالانی ردءَ ڈیرہ بگٹی ءُ اوستہ محمد لوگانی چھت کپگ ءِ سوب ءَ جنین آدم ءُ زھگاں ھوار ھشت مردم بیران بیتگ اَنت۔
اھوالانی ردءَ اوستہ محمد ءَ یک لوگے ءِ چھت کپگ ءِ سوب ءَ یکیں کھول ءِ جنین ءُ زھگاں ھوار پنچ مردم بیران بیتگ اَنت وھدیکہ ھمے پئیمیں یک وئیل ءِ ڈیرہ بگٹی ءَ ھم دیما اَتکگ کہ آودہ جنین ءُ چکاں ھوار سَے مردم بیران بیتگ اَنت۔
یات بہ بیت کہ گوستگیں یک ءُ دو ماہ ءَ بلوچستان ءِ جتاھیں ھند ءُ دمگاں ھور ءُ ھارانی سوب ءَ تباہ کاری برجاہ اِنت۔ بلوچستان ءَ ھور ءُ ھارانی سوب ءَ بیتگیں بیرانیانی کچ 200ءَ سرگوستگ۔
پی ڈی ایم اے ءَ گُشتگ کہ ھئو رانی سوب 670 کلو میٹر ءِ سرءَ بندوکیں 6 جتاھیں شھدگ سک تاوان بار بیتگ اَنت وھدیکہ جتاھیں جاھاں 18 پل پرشتگ اَنت۔ پی ڈی ایم اے دیمترءَ گُشتگ کہ سرجمی ردءَ 1 لاکھ 98 ہزار 461 ایکڑ زمین ءِ سرءَ رستگیں کشار، سولر پلیٹس، ٹیوب ویلز ءُ بورنگ تاوانبار بیتگ اَنت۔
پی ڈی ایم اے ءِ ردءَ بلوچستان ءَ سرجمی ءَ 22 ہزار 692 لوگ تاوان بار بیتگ اَنت، 690 کلو میٹر ءِ سرءَ بستگیں 6 شھدگ سانمند بیتگ اَنت ۔ ھور ءُ ھارانی سوب ءَ 18 رھوتی پل پرشتگ اَنت۔ یک لاکھ 7 ہزار 377 مال مڈیاں ھم تاوان رستگ۔