شال ءَ بیگواھیں مردمانی کھولانی نندانک ءَ ماہ ءِ سرجم

بلوچستان ءِ بنجاھی شھر شال ءَ زیارت ءِ وئیل ءَ پد گورنر کارگس ءِ دیم ءَ ریڈ زون ءَ بیگواھیں مردمانی کھولانی نندانک برجاہ، نندانک ءَ مروچی ماہ ءِ سرجم بوتگ، لوٹانی نہ منگ تاں زھرشانی برجاہ دارگ ءُ آئی ءِ تہ ءَ گیشی آرگ ءِ جار جنگ بوتگ –

مروچی زھرشانی نندانک ءَ ناموریں کانود دان ایڈوکیٹ علی احمد کُرد ءَ ھوار نیشنل پاٹی ءِ سوبائی سرکماش رحمت صالح، بنجاھی جارکش اسلم بلوچ ءُ دگہ مردماں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ آھانی گوشگ ات کہ ما زورانسری آوار جنی ءَ ترندی ءَ گوں ایرجن ایں مئے ھمے جھد انت کہ ملک ءِ تہ ءَ زورانسری آوار جنی ءِ درچ بند کنگ بہ بیت انت ءُ درسیں بیگواھیں مردم دیم ءَ آرگ بہ بنت ءُ بلوچ چکچینی بند کنگ بہ بیت –

ھمے وھد ءَ وی بی ایم پی ءِ جنرل سیکٹری سمی دین بلوچ ءَ نندانک ءِ سر ءَ اتکگیں مردمانی منت گپتگ ءُ وتی ھیال درشان اِتگ انت گوشتگ کہ ما وتی ھکئی ایں لوٹانی منارینگ ءِ ھاتر ءَ ماہ ءِ بیت کہ نندانک ءَ نشتگ انت بلے تنی وھدی مارا سنجیدگ زورگ بوگ ءَ نہ انت –

آئی ءَ گوشتگ کہ بژنی گپ ءِ کہ ملکی رسانکدر ءُ انسانی ھکانی ادارھانی نمائندگ مئے نندانک ءَ نہ گند انت مارا نزرانداز کنگ ءَ انت –

کھولانی گوشگ ات کہ مئے سادگیں لوٹ انت کہ دروگیں میڑ ءِ نام ءَ کُشگ بوتگیں مردمانی شریں وڈی ءَ پٹ ءُ پول کنگ بہ بیت ءُ دیمتر ءَ بیگواھیں مردم کُشگ مہ بنت ءُ زورانسری آوار جنگ بوتگیں مردم دیم ءَ آرگ بہ بنت ءُ آمیدگساں پیش کنگ بہ بنت –

آھانی گوشگ ات کہ مارا گوستگیں ماہ ءِ سرجم انت کہ ادا شپ ءُ روچ ھئور سر ءَ نشتگ ءُ زھرشانی کنگ ءَ انت بلے سرکار جھندم مئے مردمانی دیم ءَ آرگ ےَ دگہ گیشتر ورنا آوار جنگ ءُ بیگواہ کنگ ءَ انت –