بلوچستان ءَ ھورانی سبب ءَ دگہ بازیں مردمے بیران بوتگ ءُ درزنے مردم کور آپ ءَ چہ پستگ اَنت-
بلوچستان ءَ ھور ءُ ھاراں چہ بیرانی ءِ کچ 200 ءَ سر بوتگ اَنت – پی ڈی ایم ءَ ھوراں چہ بوتگیں انّوگیں تاوانانی رپورٹ شنگ کتگ اَنت- ھُزدار ءُ ژوب ءَ لوگے ءِ چت کپگ ءَ مروچی دہ مردم بیران بوتگ-
پی ڈی ایم اے شنگ کتگیں رپورٹ رِد ءَ گوستگیں بیست ءُ چار کلاکانی تہ ءَ بلوچستان ءَ ھور ءُ ھاراں چہ دگہ دہ مردم بیران بوتگ اَنت چریشی ءَ پد یکجاھی ءَ بیرانیانی کچ 208 ءَ سر بوتگ اَنت-
انتزامیہ رِد ءَ بیران بوتگینانی تہ ءَ 99 مردین ، 48 زالبول ءُ 61 زھگ ھوار اَنت وھدے کہ بیران بوتگیانی تہ ءَ زالبول ءُ چکانی مزنیں کچے ھوار اَنت، بیرانی بولان، شال، ژوب، دکی، ھُزدار ، کوھلو، کیچ، مستونگ ، ھرنائی ، قلعہ سیف اللہ ءُ سبی ءَ بوتگ اَنت-
پی ڈی ایم اے گْوشگ اِنت کہ ھورانی میان ءِ وئیلانی آماچ بوتگ ءُ 81 مردم ٹپی بوتگ اَنت وھدے کہ ٹپیانی تہ ءَ 49 مردین ، 12 زالبول ءُ 20 زھگ ھوار اَنت-
پی ڈی ایم اے ءَ گْوشتگ کہ ھوراں 670 کلو میٹر ءَ ھوار جتائیں شش شھدگ سک تاوان بار بوتگ اَنت- پی ڈی ایم اے ءَ دیمتر ءَ گْوشتگ کہ یکجاھی ھساب ءَ یک لکّ 98 ھزار 461 ایکڑ زمین ءَ ھستیں کشار، سولر پلیٹس، ٹیوب ویلز ءُ بورنگ تاوان رس اِتگ-
بلوچستان ءَ تُرندیں ھورانی دْرچ مرچی ھم برجاہ ءَ اِنت کہ ضلع موسی خیل ءِ دمگ اندرپڑ جھنڈی ءِ ھند ءَ لوگ چت کپگ ءَ چہ یکیں کھول ءِ نُھ مردم بیران بوتگ اَنت، ھُزدار تھسیل سیلوڈن ھند ءَ پورالی کور ءَ مزنیں آپ آرگ ءَ زالبول ءُ زھگاں ھوار نُھ مردم پس اِتگ اَنت کہ آ انگت نہ رکینتگ اَنت-
ھمے وڑ ھُزدار ساسول ءِ دمگ ءَ لوگ چت کپگ ءَ چہ یک مردمے بیران وھدے کہ ونگو ءَ ھوٹل چت کپگ ءَ یک مردمے ٹپی بوتگ-
پی ڈی ایم اے رِد ءَ بلوچستان ءَ یکجاھی ھساب ءَ 22 ھزار 692 لوگاں تاوان رس اِتگ، 690 کلو میٹر ءَ ھوار جتائیں شش شھدگاں تاوان رس اِتگ- ھور ءُ ھاراں چہ 18 ھمگرنچیں پُھل پروشتگ اَنت – یک لکّ 7 ھزار 377 مال ءُ دلوت ھم مرتگ اَنت-
بلے دگہ رسانکدرانی نیمگ ءَ چہ بیرانیانی ءُ مالی تاوانانی کچ گیشتر اَنت-