بلوچستان ءَ دگہ شش مردم زورانسری آوار جنی ءَ پد بیگواہ

بلوچستان ءِ جتا جتائیں دمگاں پاکستانی پوج ءُ چیریں ادارھانی کارمنداں شش ورنا زورانسری آوار جتگ ءُ بیگواہ کتگ انت –

ھالانی رِد ءَ دوشی شپ شال ءِ دمگ سریاب ءَ دگ پوج ءَ ھاسٹل ءَ بیڑ برتگ ءُ سَے نودربر لٹ شاپ کُتگ ءُ پدا گوں وت برتگ انت –

سریاب ھاسٹل ءَ زورانسری آوار جنگ بوتگیں یک ورنایے پجار محمد امین ء ممتاز حسن ءِ نام ءَ چہ بوتگ وھدیکہ ایندگرانی پجار تنی وھدی نہ بوتگ انت –

دومی نیمگ ءَ ھمے ھال آیگ ءَ انت کہ کیچ ءِ بنجاھی شھر تربت ءَ پنچ روچ ساری یوسف ء نثار نامی نودربرے زورانسری آوار جنگ ءُ بیگواہ کنگ بوتگ –

بیگواھیں ورنایے کھول ءِ رِد ءَ یانزدہ اگست دوھزار بیست ءُ دو ءِ شپ ءِ ادار نُھ ءَ پاکستانی پوج ءِ شش گاڑی جوسک فٹبال پٹ اتکگ انت ءُ زوراکی کنان ءَ فرسٹ ائیر نودربر یوسف نثار زورانسری آوار جتگ ءُ گوں وت بُرتگ کہ ھنگت بیگواہ ایں –

آھاں گوشتگ کہ اگاں یوسف نثار ءَ ھر وڈیں کتکاری ءِ کُتگ گڈا ملک ءِ کانودانی رِد ءَ دیم ءَ آرگ بہ بیت آمیدگس ءَ پیش کنگ بیت –

ھمے وڈ نوشکی ءَ ھم یک مردمے ءِ زورانسری آوار جنی ءِ ھال انت – ٹی بی پی ءِ اھوالکار ءِ رِد ءَ حبیب ء محمد عظیم جھمنند نوشکی قادر آباد پاکستانی پوج ءَ مزنیں ائید ءَ یک روچے ساری زورانسری آوار جتگ ءُ بیگواہ کتگ کہ پدا ھما انت آوار جنگ بوتگیں ورنایے ھچ ھال اھوال نیست –

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ انت – اشاں پیش ھمے زوتاں بلوچستان ءِ دمگ آواران، ھاران، کیچ، مستونگ ءُ کراچی ءَ شش مردم زورانسری آوار جنگ بیگواہ کنگ بوتگ انت –

گوستگیں روچاں زورانسری ءَ آوار جنگ بوتگیں مردمانی تہ ءَ چہ کراچی ءَ شیخ ایاز، چہ آواران جاؤ ءَ اسلام ء حضور بخش، اعظم ء جمیل، یاسین ء رحیم بخش، چہ کیچ ءِ دمگ تمپ پُل آباد ءَ محسن ء عبدالصمد ءُ چہ ھاران ءَ سھیل بلوچ ء عبدالرحمان ھوار انت –

دومی نیمگ ءَ چہ پنجگور ءَ سَے سال ساری زورانسری آوار جنگ بوتگیں دو ورنا قاسم ءُ حسام بلوچ یل بوتگ ءُ وتی گِس ءَ سربوتگ انت – وھدیکہ گوستگیں سال ءَ دوھزار ءُ بیست ءُ یک ءَ چہ شال ءَ زورانسری آوار جنگ ءُ پدا سی ٹی ڈی ءِ دست دیگ بوتگیں ھزدار ءِ جھمنند بلال بلوچ ھم یل بوتگ –

بلوچستان ءِ بنجاھی شھر شال ءَ بیگواھیں مردمانی کھولانی زھرشانی برجاہ انت بیگواھیں مردمانی کھولاں ماہ ءِ سرجم انت کہ آھاں شال ءِ ریڈ زون ءَ گورنرکارگس ءِ دیم ءَ زھرشانی نندانک جتگ ءَ نشتگ انت –