بلوچ راجی جھد ءِ ایرموش کنگ ءِ ھاتر ءَ ریاست بے کساس ءَ تاکت کارمرز کنگ ءَ انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ سِی ءُ چار روچ سرجم بوتگ انت –

مروچی چہ نال گریشہ ءَ سیاسی باسک خدابخش بلوچ، وھاب بلوچ ءُ دگہ مردماں مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ زندگیں راجاں مدامی وتی دود ءُ ربیدگ، وتی ھستی ءِ رکینگ ءِ ھاتر ءَ زورگیر ءُ مزنیں تاکتورانی بگیری ءَ جھد کنگی انت ، ھزارانی کچ ءَ بلوچ پرزند، آوار جنگ بوتگیں مردمانی وارساں بلوچ ءِ منزل گچین کُتگ ءُ باندات ءِ ھاتر ءَ توانمردی ءُ دلیری ءَ گوں وتی پرز ءَ پیلو کنگ ءَ انت – ھستیں وھدے پُرایمنیں جھد ءِ تہ ءَ بلوچ پرزنداں دلیری ءُ جوانیں شوربندی ءُ نزریاتی پھتوئی ءَ گوں دژمن نفسیاتی نادراہ جوڑ کُتگ کہ آ نوں فرعون جوڑ بوتگ زلم ءُ زوراکی کنگ ءَ انت ھمک روچ ماسوم ءُ وانندگیں بلوچ پرزندانی ژانگولیں جوناں ویرانگاں چگل دیگ انت ءُ بلوچانی دل ءِ چست بوتگیں پاھاراں سارت کنگ ءِ جھد ءَ انت بلے اے وڑیں گامگیجاں گوں بلوچاں ترسینگ ءُ پد کنزینگ تھنا گران نہ انت بلکیں چوش بوت نہ کنت-

ماما قدیر بلوچ ءَ گوشتگ کہ میان استمان ءَ اے گپ شری ءَ پھم اِتگ کہ بلوچ پہ وتی ھک ءُ راستی ءِ سر ءَ میان استمانی کانودانی رِد ءَ وتی ھاتر ءَ جھد کنگ ءَ انت –