اوگانستان: کابل ءَ ڈرون اُرش ءَ ھمساھگیں ڈیھ ھوار اِنت – قندھار دیوان

امارات اسلامی اوگانستان ءِ سروک شیخ ھیبت اللہ اخندزادہ ءِ سروکی ءَ اوگانستان ءِ زرباری پرگینگ قندھار ءَ برجاھیں یک مزنیں دیوان ءِھاسیں شوربندیاں پد ھلاس بوتگ-

دیوان ءَ کابل ءَ بوتگیں ڈرون اُرش ایر جنگ ءَ اَبید پاکستان نام گرگ ءَ بید گْوشگ بوتگ کہ اے جرم ءَ ھماسگیں ڈیھ گوں تچکی ءَ ھوار اِنت-

زانگ بہ بیت گوستگیں ماہ ءَ امریکی واکدار ءَ ٹاہ داتگ اَت کہ اوگانستان ءِ شھر ءَ یک ڈرون اُرشے ءَ القاعدہ ءِ سروک ایمن الظواھری نشانگکتگ چریشی ءَ آ مرتگ بلے اوگانستان سرکار ءَ اے رد کتگ-

ٹاہ جنگ بوگ ءَ اِنت کہ القائدہ سروک ءِ نشانگ کنوکیں ڈرون ءَ پاکستان ءِ ھاک کارمرز کتگ وھدے کہ پاکستانی رسانکدراں ٹاہ جتگ کہ امریکیرسانکدر ءَ پدر کتگ کہ ڈرون پاکستان ناں بلکیں کرغزستان ءِ ھاک کارمرز ئِے کتگ وھدے کہ اشی ءَ پد پٹ ءُ پول کنگ بوتگ ءُ ھچ وڑیں امریکیرسانکدر ءَ چُشیں گپ شنگ نہ بوتگ-

زانتکارانی گْوشگ اِنت کہ واشنگٹن پاکستان ءَ اُرش ءِ موکل داتگ وھدے کہ پاکستان ءَ ایمن الظواھری اوتاک پدر کتگ ءُ آ نشانگ کنگ بوتگ-

قندھار ءَ بوتگیں دیوان ءَ امارات اسلامی شیخ ھیبت اللہ اخندازدہ ءَ تران ءِ وھد ءَ مردماں چہ اسلامی ءُ نیکراھی کانود ءِ برجم دارگ ءِ ھاتر ءَ زورداتگ ءُ گْوشتگ کہ اوگانستان ءَ ایمن، اسلامی کانود ءُ آجوئی بازیں دیمونیاں پد اَتکگ، ھمے ھاتر ءَ اشانی پھازگ سرجمیں اوگانیانی پرز اِنت-

آئی ءَ سیاستدان ءُ دگہ مردم ھم گْوشتگ اَنت کہ آ امارات ءِ بگیری ءَ وتگڑیں پروپیگنڈہ مہ کن اَنت،  آئی ءَ باپاری مردماں چہ ھم لوٹ کتگ کہ آدری ڈیھ بنت یا ڈیھ ءَ باپاری بہ کن اَنت مردماں کار بدے اَنت-