بلوچستان : پوج ءِ دست ءَ چار مردم بیگواہ

بلوچستان ءِ دمگ آواران ءُ کیچ ءَ پاکستانی پوج ءَ چار مردم آوار جنگ ءَ پد بیگواہ کتگ اَنت-

سربوتگیں ھالانی رِد ءَ آواران ءِ ھنکین جاؤ شکاری گوٹھ ءَ پاکستانی پھازوکی لشکری ءَ لوگاں بیڑبرتگ ءُ سے مردم آوار جنگ ءَ پد ناشناسیں جاھے ءَ برتگ اَنت، آوار جنگ بوتگیں مردمانی پجّار اسلام ء حضور بخش، اعظم ء جمیل ءُ یاسین ء رحیم بخش ناماں چہ بوتگ اَنت-

دمگی اِھوالکارانی رِد ءَ گوستگیں پنچ روچاں چہ دمگ پوج ءِ لشکر کشی ءُ گیشیں گشتانی دْرچ برجاہ ءَ اِنت- اِھوالکار ٹاہ جنگ ءُ گْوشگ ءَ اَنت کہ پوج مردمانی پجّار کارڈ ءَ یکجاہ کنگ ءِ اَبید مردماں ھمکروچ بُنجل ءَ لوٹائین اِیت ءُ لوگ ءِ ھمک یک مردمے ساڑی ءِ زمانت ءَ لوٹگ ءَ اِنت-

بلے سرکاری واکدارانی نیمگ ءَ انگت چُشیں گپ دیم ءَ نیتکگ-

زانگ بہ بیت جاؤ بلوچستان ءِ سر وزیر قدوس بزنجو ءِ ھنکین ءُ گیچنکاری ءِ ھند اِنت وھدے کہ جاؤ بلوچستان ءِ ھما دمگاں چہ یک دمگے کہ اود ءَ زندمان ءِ بُنکی آسراتی نیست اَنت اشی ءَ اَبید ھمکروچ دمگی مردم شکایت کن اَنت کہ پوج مردماں جنجالی کنگ ءَ اَبید جاؤ یک بُنجلے دروشمیں دمگے جوڑ کتگ کہ اود ءَ مردماں چہ یک میتگے ءَ دومی میتگ ءَ روگ ءِ ھاترءَ موکل گرگ لوٹ اِیت-

دومی نیمگ ءَ کیچ ءِ دمگ تمپ پل آباد ءِ پاکستانی پوج ءَ لوگے ءَ بیڑبرتگ ءُ محسن ء عبدالصمد نامیں ورنایے آوار جتگ ءُ بیگواہ کتگ-