سمی دم درینگانے – زبیر بلوچ

نبشتانک: سمی دم درینگانے

نبشتہ کار: زبیر بلوچ

دی بلوچستان پوسٹ

اکبر بگٹی ءِ کوش ءَ ایوک ءَ سیاسی کلچر ادب ءُ چاگردی سنچاں نوکیں مانا نہ دات بلکیں سیاست ءِ tipping point سابت بوت نوکیں ٹینڈسی ورناہ آں تھریک دے انت پُرکار کن انت پُرکار ءُ پگری ورناھیں زھگ زائپگ ءُ نھاڑیانی مزنیں بھرے سیاست ءَ اوار بُوگ ءَ سیاست دوستاناکی گام ءُ انٹی فیوڈل ءُ انٹی سرادار ءِ زانتی راھبند ءِ سر ءَ دیما جنزان بیت۔ سردار نواب ءُ روایتی مھلوک کہ بلوچے ءُ بلوچ سیاسی تھریک ءِ چاگرد ءِ لس مھلوک ءِ ازلی دژمن آں ایشانی دست ءَ چے سیاست دراتک بی ایس او ءِ وانندھیں سنگتانی ءُ لس مھلوک ءِ دست ءَ اتک۔

اؤلی دور ءِ سیاست سرادارنی دست ءَ ینگ بلوچ (بلوچ لیگ) قلات اسٹیٹ نیشنل پارٹی ءَ کشیتگ ات ءُ سیاسی سروکی لس مھلوک ءِ دست ءَ داتگ ات بلے بلوچ چاگرد ءِ اربنائز نہ بوگ ءُ شنگ ءُ شانگیں آبادی ءُ نا ھموار ءُ آشوبی چیردستی ءِ نہ بوھگ ءِ سبب ءَ سردار ءُ فیوڈل لارڈاں زُوت کم بیک کُت ھروھد ءَ اے مھلوک ءَ لوٹ اِتگ کہ سیاست ءُ چاگرد آھانی دست ءَ بہ بیت ءُ وتی پُلپھانچی پالیسان سرکار ءِ کمک ءُ مدت ءَ دیما بہ براں۔ پمیشکا ایشاں مدام لگت بلوچ ءِ گٹ ءَ داتگ ءُ ایشانی سیاسی معاشی سماجی لٹ ءُ پل کتگ بلے اے باریگ ءَ پد ءَ سیاست ینگ بلوچ ( قلات اسٹیٹ نیشنل پارٹی ) انجمن (اتحاد بلوچاں) استمان گل نشنل پارٹی ءِ نظریاتی تسلسل ءِ پیڈرن ءَ بلے وتساچیں بنیاد ءَ قومی ءُ ٹکی کسرے گیپتگ ات۔
سلاہ بندیں جھد کہ ھر وھدا قبائیلی ڈسپلن ءُ قبائیلی سینٹرک بوتگ۔ نوں لس بلوچ ءِ سلاہ بندیں جھدے جوڑ بوتگ ات مکران ءِ لس مھلوک درتہ پچ ءُ گریب ءُ وانندھیں ورناہ جھد ءِ مرکزی کردار اِت اَنت۔ چہ ایشاں سراوان ءُ جھلاوان ءِ ورنایاں اسر گیپت ءُ سلاہ بندیں جھد ءِ بھر بوت اَنت-

1986ءَ بی ایس او ءِ پْروشگ سیاسی کارکنانی ھاس کر بی ایس او ءِ سنگتانی توک ءَ بلاھیں مایوسی دلپروشی یے بد دلی یے پیداک کتگ اَت اے مایوسی ءَ ورناہ بردار کشی نشہ کلاشنکوف کلچر اسلامی بنیاد پرستی دمگی نزیک چاری ءُ وتمانی ریٹانی ءِ نیمگ ءَ برت اَنت ۔ شال ءَ بی ایس او ءِ سنگت ڈاکٹر سلیم بلوچ طلبا سیاست ءِ یک فارگٹن ھیروے کشگ بیت ۔پد ءَ زوت فدا احمد کُشگ بیت فدا احمد ءِ کوش ءَ بلوچ سیاسی راجدپتر ءِ یک مزنیں واکھے اَت۔ اے کوش ءَ سیاست ءِ روتگ سُرینت اَنت۔ بی ایس او ءِ پارگ بوتگیں سنگتانی توک ءَ فدا احمد ءِ وڑیں بود ءُ برکتی یے سنگت دگہ نیست ات کہ آ دیما بئیت سروکی بہ کنت۔ سنگت ڈاکٹر حئی ءَ دیم ءَ کار اَنت چونھا فدا ءِ زند ءَ ڈاکٹر حئ سنگتاں دیم ءَ کتگ ات بلے آ وھدا فدا احمد ءُ سنگتاں پشت ءَ چے کلیں کار وتی کوپگاں زرتگ ات اَنت ءُ ڈاکٹر حئی انچو دیم ءَ داشتگ ات۔ ایشی ءِ توک ءَ سیاسی سِنچ ءُ زانت نیست ات بلے نیستی ءَ شمبوگے اَت اے اسپیس ءَ سروکی ءِ ناگیگی پیداک بیت ھاس کر ھمے نوکیں زانتی زرمبشت کہ بی ایس او ءِ پارگ بوتگین سنگتاں بنا کتگ اَت سک باز اسر مند بیت اسل ءَ اے واکھہ انقلابی ھالاتانی آئیگ ءِ توپانے ات بلے ایشی ءَ پولیٹیکل لائن آف ایکشن ءِ دئیگ ءِ بدل ءَ زانشتی دگا بازی ءِ آماچ کنگ بیت نظریاتی دَگاھی ءِ بنیادی وجہ ایش ات کہ اے مھلوک ءَ دمبرتگ ات ۔ روس ءِ ھالات مٹ بوتگ ات اَنت ایشانی زیادہ تر امیت گوں روس ءُ اوگانستان ءِ سرا اِت اَنت اے زمانگ ءَ دنیا دو بلاک ءَ بھر ات ءُ بلوچ زانشتی ھوالہ ءَ سویت کیمپ ءَ ات گورباچوف ءِ گلاسنوٹ ءُ پیرایسٹیریکا ءِ پالیسانیاں سببءَ روس ءَ نوکیں ڈسکشنءِ پچ کتگ ات ۔ بلے دُراھین چیزاں ابید فدا ءِ کوش ءَ بی ایس او ءِ پروشگ ءِ دراھیں مایوسی بد دلی دلپروشی لیپگ کت ورنایانی توک ءَ نوکیں زندے پیداک بوت ۔ فدا ءَ وتی ھوناں بلوچ سیاست ءِ مرتگیں درچک زندگ کت بلے فدا ءِ اڑ داتگیں نوک رُدوم گیپتگیں سیاسی گل بلوچستان نشنل یوتھ مومنٹ ءِ سروکی ءَ نابالیدگی اشتاپ کاری یے شکار بیت ءُ ایشان بیدئے پارلیمنٹ ءَ دگہ راہ سمجھا نیتک ھمے اشتاپ اشتاپ ءَ بلوچستان نیشنل یوتھ مومنٹ ءَ بی این ایم ءِ نامہ پارلیمانی پاٹے کن اَنت۔ ھمے رنگ ءَ بلوچ سیاسی راجدپتر یک بلاھیں واکھے ءِ سروکی ءِ وت پرستی مُشگ ءِ وجہ ءَ چہ تھریک ءِ رنگ ءَ دیم ءَ آرگ ءَ ناکام بیت۔ بلے فدا احمد ءِ ھون ءِ برکت نوک جوڑ بوتگیں پاٹی 1988ءِ الیکشن ءَ مکران ءِ دراھیں دمگاں وتی سیٹ آں کاریت ءُ بی این اے ءِ حکومتی اتحادی یے بیت اِنت۔

روان انت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔