شھید ھیات ءِ مانشجاہ ءِ سر ءَ ڈیوا بالینگ بیتگ اَنت

بلوچستان ءِ دمگ کیچ ءِ بنجاھی شھر تربت آپسر ءَ حیات بلوچ ءِ نودربریں سنگتاں آئی ءِ مانشجاہ ءِ سر ءَ شُتگ ءُ اودا ڈیوا بالینگ بیتگ انت –

آئی ءِ نودربریں سنگتاں شمبے ءِ بیگاہ ءَ آئی مانش ءِ سر ءَ شُتگ ءُ ڈیوا بالین اتگ ءُ آ دروت ندر کُتگ گوشتگ کہ حیات بلوچ ءِ کوش بلوچ نودربرانی ٹارگٹ کلنگ ءِ درچ انت –

زانگ بہ بیت دو سال ساری سینزدہ اگست ءَ کراچی شھدربرجاہ ءِ نودربر حیات بلوچ سر ءَ ھما وھد ءَ ایف سی ءِ کارمنداں تیرباران کن انت وھدیکہ بلوچ لبریشن آرمی ءِ نیمگ ءَ پوجی گاڑی ءِ سر ءَ بمب تراک ءِ کنگ بیت پدا رند ءَ ایف سی ءِ کارمند نزیکیں باگے ءِ سر ءَ رو انت ءُ حیات بلوچ ءَ جن انت –

یات بہ داریت حیات بلوچ ءِ کوش ءِ بگیری ءَ بلوچستان ءَ ھوار درملکاں سول سوسائٹی، نودربر گل ءُ سیاسی پاٹیانی نیمگ ءَ زھرشانی کنگ بوتگ –

زانگ بہ بیت بلوچستان ءَ مردمانی کشت کوش ءِ بھتام ایف سی ءِ سر ءَ جنگ بوگ ءَ انت بلے حیات بلوچ کوش، دمگی مردمے ءِ کوش ءِ اولی وئیل انت کہ آئی ءِ ارزی نبشتہ کنگ ءُ ایف سی ءِ کارمند ءَ مرگ ءِ سزا دیگ بوتگ –