بلوچستان : ھئورانی درچ برجاہ،دگہ شش مردم بیران اَنت

بلوچستان ءِ جتا جتائیں دمگاں ھئورانی درچ برجاہ انت –

گوستگیں روچ ءَ توپانی ھئور ءَ قلعہ سیف اللہ ءِ دمگ مسلم باگ ءَ تباھی آرتگ کہ چریشی ءَ بازیں گِساں تاوان رس اتگ انت –

لسبیلہ ءِ دمگ لُنڈا کور ءَ کراچی تاں شال ءَ رؤکیں دگ ھم ھار بُرتگ چریشی شال تاں کراچی ءَ رؤگ آھگ زمینی راہ یکبرے پدا بند بوتگ –

ھئور ءُ ھاراں دگہ شش مردم بیران بوتگ انت – بیران بوتگیں مردمانی کچ نوکیں کساساں ھوار یکسدو ھشتاد ءُ دو ءَ سربوتگ انت –

شال ءَ ھوار بلوچستان ءِ دگہ ھند ءُ دمگاں ھئور لھتے جاہ ءَ شنزگ انت ءُ لھتے جاہ ءَ گوارگ ءَ انت-

موسم بنشون ءِ رِد ءَ لسبیلہ، بارکھان، دکی، زیارت، سنجاوی ءُ چمن ءَ ھئور بوتگ انت –

قلعہ سیف اللہ ءِ دمگ مسلم باگ ءَ توپانی ھئورانی سوب ءَ بازیں دمگ ءَ آپ اتکگ ، آرگس، سلطان آباد، جان آباد، شین خڑ ءَ توپانی ھئور ءَ تباھی کتگ –

دمگی مردماں گلہ کُتگ کہ توپان ءَ سرجمیں میتگ تباہ کتگ انت بلے دمگی واکدار ءُ پی ڈی ایم ءِ نیمگ ءَ ھچ وڈیں گامگیج زورگ بوگ ءَ نہ انت، سرکار اثرمندانی کمک ءَ بہ کنت –

اُتل ءَ لنڈا کور ءِ دگ ھم آپ ءَ برتگ ءُ چریشی ءَ دگ بند انت ءُ ھچ وڈیں روگ آھگ بوگ ءَ نہ انت –

کلات ءِ کمشنر داؤد خلجی ءِ گوشگ انت لنڈا ندی ءِ پُھل ھار ءَ بُرتگ، مھلوک کراچی تاں شال رؤگ ءِ ھاتر ءَ پھریز بہ کن انت –

دومی نیمگ ءَ پی ڈیی ایم اے رپورٹ ءِ رِد ءَ بلوچستان ءَ چہ ھئور ھاراں دگہ شش مردم مرگ ءِ دیمپان بوتگ انت بیران بوتگیں مردمانی کچ یکسدو ءُ ھشتاد ءُ دو ءَ سربوتگ انت ءُ ھژدہ ھزار ءَ گیش گِساں تاوان رستگ –

پی ڈی ایم اے ءِ واکدارانی رِد ءَ ھئوراں چہ پد اثرمندیں دمگاں کمکی کار بندات کنگ بوتگ انت –