زورانسری آوار جنیانی بگیری ءَ درسیں راجدوستاں جد ءُ جھد کنگی انت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ بیست ءُ ھشت روچ سرجم بوتگ انت –

مرچی وکیل ءُ دگہ تک ءُ پھناتاں سیادی داروکیں زالبول ءُ مردیناں زھرشانی بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ مارا دو دھک انت کہ زھرشانی کنگ ءَ انت بلے ریاست ءَ زورانسری آوار جنیانی درچ گیش کُتگ انت –

ماما قدیر بلوچ ءَ گوشتگ کہ بیگواھیں مردمانی کھول شپ ءُ روچ دگانی سر ءَ کپتگ انت بلے آھاں انساپ نہ رس ایت –

آئی ءِ گوشگ ات کہ بلوچستان ءِ تہ ءَ مروچی ھر یک گِس ءِ ریاستی زوراکیانی آماچ انت، مردم زھرشانی کنگ ءَ انت بلے میڈیا سرجمی ءَ بلیک آؤٹ انت –

آئی ءَ گوشتگ کہ بلوچستان ءَ بیگواھیں مردمانی جیڑہ ھرابتر بوان انت – درسیں راج دوستاں ھوار بوگ ءُ بیگواھیں مردمانی کھولانی توار جوڑ بوگی انت –