نبشتانک: سائرہ تو بلوچے ئے
نبشتہ کار: زھیر بلوچ
دی بلوچستان پوسٹ
ھردیں کہ وتی آتراپ ءَ چماں شانک دیاں گُڑا ارس ءُ ھون ءِ نہ کُٹوکیں یک ربیت ءِ گندگ بیت بلوچ گُلزمین ءِ سر ءَ مروچی ھمُک چم اھدے زوراکاں ارسیگ کُتگ اَنت ھمُک گِس پُرسیگ انت بلوچ مات ءُ گھُارانی بزگی ءُ بیوسی منی ارواہ ءَ داگ پِردار انت بلوچ گُلزمین ءِ سرا ھمُک گِس ودارے آس ءَ روک اِنت دمک ءُ درانی تہ ءَ زھگانی چیھانٹ شِنگ اَنت۔
ساھگریں جاورانی سیاہ بزیں جمبراں سرجمیں بلوچستان مانپوشتگ برے برے ھُدا ءَ جُست کناں ھُدا تو کدی بلوچ گُلزمین ءِ سر ءَ وشیانی سوگات اں کارے ءُ ایمنی ءِ رگاماں شَل ئے دانکہ بلوچ ءِ ھمِک گِس گوں بچکنداں میزران بہ بیت کدی مئے بلوچ ماتانی چمانی روک چہ تھاریں زندان ءَ واتر بنت کدی اے سالاچیں آس ایرماد بیت کہ مروچی بلوچستان ءِ ھمُک گِسے لپاش اتگ؟
بلوچ گُلزمین ءِ سر ءَ اھدے زوراکانی زوراکی ھمک روچ گیش بوان اَنت ءُ بلوچ چاگردے ھمک کارست ھمے زوراکیانی آماچ اِنت سائره هم هما کارست اں چہ یکے کہ همے آس ءِ برانزاں سُچان اِنت سائره ءِ باتن ءَ هم ودارے درچکے رُستگ کہ همُک روچ همے درچک ءَ وتی ارساں گوں آپ دیان اِنت یکیں لوگ ءَ دو چراگ یکجاه پُلگ ءُ تهاریں زندان ءَ بندیگ کنگ بہ بنت گُڑا آ لوگ ءِ جاور چون بنت اے جیڑگ منا تکانسُر کنت-
سائرہ تو گپ ئے زان ئے ما تئی درد ءُ تورشت ءِ کساس ءَ کُت نہ کنیں ما تئی اندر ءِ آس ءَ مار ات نہ کنیں چیا کہ ما اے ساهگریں ندارگ ءَ چہ نہ گوستگیں تئی ارسانی کِسہ ءَ هما مردم ونت کنت آ وت همے ندارگ ءَ چہ گوستگ یا گوزگ ءَ اِنت-
سائرہ چار سال انت تو وداریگ ئے کہ کد تئی گِس ءِ هردو چراگ تئی برات آسِپ بلوچ ءُ رشید بلوچ چہ تهاریں زندان ءَ واتر بہ بنت ءُ تئی گِس پد ءَ رُشنا بہ بیت تو پد ءَ وتی زندمان ءِ وشیانی منگیراں بہ بئے تو پد ءَ گوں وتئی براتاں وش ءُ ایمنیں زندے ئے واهُند بہ بہ ئے سارول من زاناں تو وانگ لوٹ ئے تو پہ وت ءُ پہ وتی راج ءَ رُشناهیں بانداتے سینگارگ لوٹ ئے بلئے اے زورگریں اِستان ءَ مرچی تئی سرجمیں واهگ لپاش اتگ انت تئی اوستانی واب اچ تو پُلیتگ انت اے اھدے زوراک بلوچاں وانگ ءَ نئلیت مرچی تو پہ وتی براتانی چہ زورگریں لشکر ءِ زندان ءَ آجوئی ءِ هاترا وتی سرجمیں وشی بِبا داتگ انت ءُ کِشک ءُ دگانی سر ءَ زهرشانی ءَ نِشتگ ئے-
سارول من ترا هال دیگ لوٹاں کہ مرچی تئی وڑ ءَ هزاراں بلوچ گُهارانی زندے وشی اے زورگریں اِستان ءَ پُلیتگ انت آھانی زندمان درد ءُ تورشتانی آماچ کُتگ مرچی تئی وڑ ءَ ھزاراں بلوچ گهُار پہ وتی مهروانانی چہ زندان ءَ آجوئی ءِ هاترا کِشک ءُ دگانی سر ءَ نشتگ اَنت کہ پہ هُدا مئے مهراواناں مارا واتر بکن اِت-
کسے ءِ پِت کسے ءِ برات کسے ءِ لوگ واجہ چہ آهاں زورگریں لشکر ءَ زِتگ اَنت ءُ زندانیگ کتگ اَنت سارول تو بزان کہ اے ربیت چو هلاس نہ بیت اے ربیت همک روچ برجاه اِنت اے زورگریں اِستان ءِ نیمگ ءَ چہ بلوچ چُکچینی ءِ ربیت اِنت ءُ اے ربیت داں هما روچ ءَ مانیت دانکہ بلوچ گلزمین ءُ بلوچ راج چہ زورگریں لشکر ءِ چنگُلاں آجو نہ بیت-
سارول تو بہ مار ءُ بہ زان تو بلوچے ئے کہ زیردست ءُ گُلام ئِے تئی گُلزمین زیردست انت دانکہ اے زیردستی است انت تئی وڑ ءَ همک روچ بلوچ مات گهار کِشک ءُ دگانی سر ءَ نیندوک بنت ءُ همک گِس ءِ چراگ پُلگ ءُ زندانیگ کنئگ بنت-
منی دُوا انت تئی گِس ءِ هردو چراگ واتر بات اَنت پہ سلامتی۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔