بلوچستان ءِ ماسٹر ناامیتی ءِ آماچ انت – گورنمنٹ ٹیچر ایسوسی ایشن

گورنمنٹ ماسٹرانی شُدکشیں زھرشانی برجاہ، ماسٹرانی لوٹ انت کہ سرکار لوٹاں بہ منّ ایت –

بلوچستان ءِ گورنمنٹ ٹیچرز ایسوسی ایشن ءِ اگدہ داراں گوشتگ کہ گورنمنٹ ٹیچرز ایسوسی ایشن ماسٹرانی ھک ءُ وانگجاھانی تہ ءَ شری آرگ ءُ بنکی لوٹانی ھاتر ءَ جھد کنان ءُ پیداک انت بلے بلوچستان ءِ تہ ءَ ماسٹر ماسٹری داب ءَ چارگ نہ بنت –

پریس کانفرنس ءَ اھوالکاراں گوں تران کنان ءَ ماسٹرانی گوشگ ات کہ ما ھژدہ جولانی بگر تاں دو اگست ءَ زھرشانی ءَ نشتگ بوتگ ایں ءُ پدا سَے اگست انت کہ مئے شُدکشیں زھرشانی برجاہ انت – اے میان ءَ زھرشانی ھم کنگ بوتگ ءُ سرکار ءِ گوم ءَ گند ءُ نند ابید ھم مئے لوٹ منّگ بوگ ءَ نہ انت –

شُد کشیں زھرشانی ءَ نشتگیں گورنمنٹ ماسٹر ءِ گوشگ ات کہ بلوچستان ءَ ابید ایندگہ سوبھاں ماسٹرانی اپ گریڈیشن ءُ آھانی تنخواہ گیش کنگ بوتگ انت ءُ آھاں گیش مراعات دیگ بوگ ءَ انت بلے بلوچستان ءِ جاور جتا انت – شدکشیں زھرشانی ءَ ماسٹراں اگاں چیزے بہ بیت گڈا آئی ءِ زمہ دار سرکار انت –

آئی ءَ گوشتگ کہ گوستگیں دو سال انت کہ سرکار گپ انگر ترین ایت ءُ آنگر ترین ایت ما ھستیں وھدے سرکار ءِ گور ءَ اے گپ ءَ پدر کنگ لوٹ ایں کہ ماسٹرانی ھکانی ھاتر ءَ ما ھچ وڈیں کربانی دیگ ءَ چک ءُ پد نہ بہ ایں – پانزدہ اگست ءَ بلوچستان اسمبلی ءِ دیم ءَ زھرشانی ءُ نندانک بیت اِنت –

ماسٹرانی گوشگ ات کہ اگاں مئے لوٹ منّگ نہ بوتاں گڈا شانزدہ اگست ءَ درستیں ٹریڈ یونیز، وکیل ءُ باپاری مردمانی ھمراھی ءَ دیوان ءِ کن ایں دیمتری کارانی باروا جیڑیں ءُ ھبدہ اگست ءَ سرجمیں بلوچستان ءِ مزن شھدگ بند کنگ بنت –